Laudioko Udalak jakinarazi du kalistenia parkea eraikitzeko kontratazio prozedura abiatu duela. Buletinean plazaratu eta gero, enpresek 10 egun izango dituzte eskaintzak egiteko, eta 6 aste gauzatzeko.
Gimnasia egiteko gune hori eskatzeko sinadura bilketa egin zuten zenbait gaztek, eta laster Goikogane kaleko plazan kokatuko dute. 35.000 euro erabiliko dituzte horretarako eta 144 metro karratuko zabalera izango du parkeak.
Udal langileek atonduko dute zorua eta enpresa pribatuak instalatuko ditu tresnak: barrak, bankuak eta abar, abdominalak eta antzeko ariketak egin ahal izateko.
Kirol azpiegituretan 30.000 euro
Horrez gain, Laudioko Udalak hainbat tamainetako lanak gauzatu ditu hainbat kiroli dagokienez. Kiroldegian igerilekuen kortxo-ilarak aldatu dituzte eta uretako gerrikoak ere berritu dituzte, 2.100 euro baliatuta. Halaber, aulki gurpilduna erosi dute 1.050 euroren truke. Sauna ere ordezkatuko dute 7.440 euroko gastua eginda.
Horrez gain, tatami zorua jarri dute yoga gelan 2.350 euroko inbertsioarekin eta gimnasioan zenbait tresna aldatu dituzte: 2 bizikleta estatiko eta bizikleta eliptiko bat jarriko dituzte 5.000 euro horretara bideratu ostean. Korrika egiteko zinta berria ere egongo da eta 2.300 euro balio izan ditu.
Aldageletan ere esku hartu dute eta umeentzako aulkia eta aldatzailea egongo dira aurrerantzean erabilgarri. Eskubaloi taldeak, aldiz, ate berriak izango ditu. Aipatutako berrikuntza guztiak Granja kiroldegian egin dituzte.
Bestalde, San Martingo futbol zelaian aritzen diren taldeak esku-ohe berriarekin hornitu dira eta atletismo taldeak koltxoneta estaltzeko gurdia izango du. Horrekin saihestuko dute haizeak eramatea. 3.900 euro balio izan du tresnak.