Antzoki proiektuaren lehiaketa eten da, Euskal Herriko Arkitektoen Elkargo Ofizialaren helegitea dela eta

Altzarraten kokatu nahi dute antzokia. / Aiaraldea.eus

Jon Ander Altubek adierazi duenez, azaroaren 19ko Hirigintza Batzordean landuko dute gaia. Helegiteak proiektua oztopatzen duela aitortu du alkateordeak, baina "egitasmoarekin aurrera jarraitzeko borondate osoa" nabarmendu du.

Laudioko antzoki proiektuaren lehiaketa etetea erabaki du Euskadiko Kontratuen inguruko Errekurtsuen Administrazio Organoak (OARC),  Euskal Herriko Arkitektoen Elkargo Ofizialak lehiaketaren oinarrien gaineko helegite bat aurkeztu duelako. Elkargoaren aburuz, lehiaketaren oinarriek lehia mugatzen dute, arkitekto askok ezin dituztelako bertan zehaztutako hainbat baldintza tekniko eta profesional bete.

Helegitearen arabera, proposamen irabazlea hautatzeko fasearen diseinuak ez ditu anonimotasun irizpideak betetzen. Horrez gain, zenbait betekizun “gehiegizkoak” direla uste du elkargoak, “lehen hautaketa fasean eraikinaren maketa aurkeztea eskatzea edota gutun-azalak aurkeztean tasak ordainaraztea kasu”.

Bi hilabeteko etenaldia
Gauzak hala, lehiaketa geratzea erabaki du OARCek kautelazko neurri gisa, helegitea aztertu eta ebatzi arte. Errekurtsuen organoak helegitea onartzen badu lehiaketaren oinarriak aldatu beharko dira, eskatutako aldaketak sartzeko. 


Jon Ander Altubek adierazi du bi hilabeteren buruan izango dutela ebazpenaren berri. Alkateordeak iragarri du azaroaren 19an egingo duten Hirigintza Batzordean landuko dutela gaia, baina nabarmendu du borondate osoa dutela proiektuarekin aurrera jarraitzeko. 347.391 euro bideratu ditu udalak antzokiaren egikaritze proiektua gauzatzera.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide