Aintzinako ospakizuna dira Magosto jaiak Galizian. Gaztainaren garrantzia azpimarratzera datoz festa hauek. Patata Ameriketatik Europara heldu aurretik gaztainak ziren orduko karbohidrato iturri nagusia, baita ezinbesteko elikagaia ere.
Azaroan bildu ohi ziren gaztainak eta hauen bilketa festa batekin amaitzen zen, magostoak hain zuzen. Galizian bakarrik ez, Iberiar penintsula iparraldeko zonalde askotan antzeko usadioak mantendu dira, Euskal Herrian esaterako. Laudioko Galiziar Etxeak festa honekin jarraitu nahi du, “non Euskal Herriko eta Galiziako tradizioak elkartu egiten diren”.
Asteburu osoko egitaraua
Egitarau oparoa antolatu dute astebururako. Atzo piztu zen jaia Aldai Plazan eta igandera arte luzatuko da. 12:00etan gaitapoteoa abiatuko da Laudioko kaleetan zehar Laudioko Espalladoiro eta Santurtziko Corxa Ariños Galegos Doce Albor taldeekin. 15:00retan anaitasun bazkaria egingo dute Galiziar Etxean eta 18:00etan, aldiz, gaztainen salmenta Aldai Plazan. “Amigos del Swing” taldeak eta “queimada” herrikoiak girotuko dute iluntzea.
Igandean festak Aurrera jarraituko du, besteak beste, Itxarkundia dantza taldearen erakustaldiarekin. Emanaldia Aldai Plazan izango da 12:00etan. Egun guztian zehar txosna jarriko dute plazan bertan eta jai-giroa arratsaldera arte luzatuko da.