aiaraldea.eus

Oñatiko espazio publikoei buruzko jardunaldiak bisitatzen abiatuko da Kulturkon kultura kongresua

Erabiltzailearen aurpegia Txabi Alvarado Bañares   Kultura  Laudio

Horrez gain, bilera irekia egingo dute datorren astean, Arabako Foru Aldundiak Kultur Etxean egingo dituen obren nondik norakoak azaltzeko.

Oñatiko espazio publikoei buruzko jardunaldiak bisitatzen abiatuko da Kulturkon kultura kongresua
Oñatiko Eltzia eraikina bisitatuko dute, "inspirazioa bilatzeko". / Beñat Irasuegi | Ikusi handiago | Argazki originala

Abian dago Kulturkon Kultura Kongresua. Laudioko Kultura Asanbladak sortu du egitasmoa, herriko elkarte, eragile zein norbanakoak kulturaren inguruan hausnartzen jarri eta adostasuna lortzeko.

Oraindik ez dute behin betiko egitaraua zehaztu, baina lehen ekintza aurkeztu dute. “Inspirazio ibilaldia” egingo dute ostiral honetan Oñatin espazio publikoen kudeaketari buruzko jardunaldietan. Eltzia eraikina bisitatzeko profitratuko dute bidaia. Mondragon taldearen eraikin hori hutsik geratu zen duela zenbait urte, eta kultura eta sorkuntza topaleku bihurtu dute.

Eltziako kideek hartuko dute hitza jardunaldietan, antzeko beste lau proiektuetako kideekin batera: Can Battló (Bartzelona), Bentaranoa (Getxo), Plazara (Iruña) eta CSC Luis Buñuel (Zaragoza). “Apurka apurka zabaltzen ari da espazioen auzo-kudeaketa sistema”, azaldu dute Kultura Asanbladako kideek. Horregatik, mota horretako esperientziak ezagutu nahi dituzte, Kultura Kongresuari begira baliagarriak izan daitezkeelako.



Oñatira joateko ordua jarri dute ostiralean, 16:00etan Musika Etxearen parean. 22:00ak aldera itzuliko dira, eta interesa duen herritar orori zabaldu diote bidaian parte hartzeko gonbita. Bihar -azaroak 15- izango da izena emateko azken eguna,  laudiokokulturasanblada@gmail.com helbidera mezu bat bidalita. Parte hartzea doakoa izango da, eta bidaiaren gastua guztien artean ordainduko dute.

Egitarauak, bi ardatz
Asanbladako kideek aurreratu dute Kultur Kongresuaren egitarauak bi ardatz izango dituela. Alde batetik, herriko kulturari buruzko hausnartzeko hitzaldia, tailer eta dinamikak egingo dituzte.

Bestetik, kultura ekintzen programazioa atonduko dute, ekimena jendarteratzeko balioko duena. Interesa duen elkarte eta norbanako oro arestian aipatutako helbide elektronikoaren bidez jarri daiteke harremanaten asanbladako kideekin.

Kultur Etxeko obrei buruzko bilera irekia, datorren astean
Datorren asterako beste zita bat jarri dute Kultura Asanbladako kideek. Arabako Foru Aldundiak Kultur Etxean egingo dituen obrak azaltzeko bilera irekia egingo dute. Kongresuaren lehen fasea ere aurkeztuko dute, eta bigarrena lantzeari ekingo diote. 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa