[IRITZIA] Lorategi bat Amagoiarentzat

Hasierako ideia zuhaitz bat landatzearena izan zen. Baina, antza, tokiak ez duela horretarako aukera handirik edo egokirik uzten eta azkenean … loreak!

Bai, lorategi bat eskainiko diogu Amagoiari, Amagoiaren lorategia, berea eta guztiona izango dena. Bere ohorez sortutakoa, herriko memorian gordetzekoa, berriro inoiz horrelakorik ez dugula pairatu nahi argi eta ozen adierazita, Laudioko andra guztion partetik eskainitako lorategia. Jakin dakigun arren, Laudioko herriak bere osotasunean eskaintza bera egiten diola.

Laudioko memorian gordeko da Urumea auzoan Amagoiari gertatuko bidegabekeria. Amagoiaren auzokideak, familia, lagunak… zaila izango dute ahaztea pasarte ilun hau. Eta, ez da ahaztu behar. Elkarren zaintza eta errespetuan oinarritutako bidea erakutsi beharko digu pasarte honek.

Pasarte ilun honetatik abiatuta, zeozer ikasi eta guztion artean etorkizuna kolorez margotzeko prest gara Laudioko emakumeok. Lorategi honetan aurkituko ditugun koloreak emango digute indarra eta kemena emakumeon eskubideen alde aritzeko. Ederto dakigu eta, sarean, auzolanean edo elkarlanean arituta lorategi ederragoak lortzen direla.

Eskertzen dugu ekitaldi xume honetan parte hartu nahi izan duten elkarteen lankidetza eta batez ere familiari eskertzen diogu etorrera. Eta, ez da esku hutsik joango etxera, lorategi honetako lore bat emango baitiogu, Amagoiaren lorategi honen parte txiki bat ere izan dezaten Orozkon, euren etxean.

Goian Bego, Amagoia.