aiaraldea.eus

Iñigo Cabacasen familia: "Epaia gazi-gozoa da, egia aitortu du, baina arduradunak zigortu gabe"

Erabiltzailearen aurpegia Aitor Aspuru Saez   Jendartea  Laudio

Iñigo Cabacasen senideek adierazi dute epaiak bere bertsioa aitortu duela, baina ez duela gaztearen heriotzaren arduradunen aurkako zigorrik ezarri.

Iñigo Cabacasen familia: "Epaia gazi-gozoa da, egia aitortu du, baina arduradunak zigortu gabe"
Amaia Lizeranzu eta Oier Amorrortu, Iñigo Cabacasen Aiaraldeko senideak. / Aiaraldea.eus | Ikusi handiago | Argazki originala

Iñigo Cabacasen senide batek jakinarazi dio Aiaraldea hedabideari Bilboko Epaitegiaren erabakiak zapore "gazi-gozoa" utzi diela.

Izan ere, epaileak onartu eta aitortu du senideek eta lagunek salatutako guztia: neurririk gabekoa izan zela Ertzaintzaren esku hartzea, ez zegoela justifikatuta indarkeriaren erabilera eta protokoloak ez zirela errespetatu, besteak beste.

Horrez gain, justiziak zabaldu du poliziak eta ordezkari politikoek ez zutela ikerketarik egin eta interes gutxi izan dutela gertatutakoa argitzeko.

Ertzainen bertsioa ukatuta
Iñigo Cabacasen senideek gehitu dute epaileak zalantzan jarri duela ertzainek egindako adierazpenak eta gezurtzat jo duela kaputxadunek objektu zaparrada bota izana segurtasun indarren kontra. Hau da, ez zen egon ez kaputxadunik ez jaurtiketarik. Are gehiago, epaiak jaso du Ertzaintzak sortu zuela zegoena baino arrisku gehiago.

Zigor eskasa
Epaileak familiaren argudioak egiatzat hartu baditu ere, Iñigo Cabacasen gertukoek uste dute zigorra motz geratu dela. De Pablo ertzainari 2 urteko kartzela zigorra ezarri dio, baina ez da espetxera joan beharko.

Bestalde, senideek ez dute ulertzen polizia hori zigortzea pilotakadak ez gelditzeagatik -karga egitearekin ados ez zegoen arren- eta agindua eman zituztenak absolbitzea. Antza, epaiak berak islatzen du ikerketa faltaren ondorioa dela hori.

Helegitea
Aipatutako aldagai horiek guztiak baloratzen ari da familia ebazteko errekurtsoa jarriko duten. Besteak beste, pentsatu behar dute zein ardura eskatu daitezkeen, adibidez, epaileak argi ikusi badu zenbait ertzainek gezurra esan zutela.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa