aiaraldea.eus

"Kultura arratsaldeak Kasinoan" dinamika aurkeztu dute, azpiegituraren aukerak esperimentatzeko

Erabiltzailearen aurpegia Izar Mendiguren Cosgaya   Kultura  Laudio

Kulturkon ekimenak 4 ekintza egingo ditu urtarrilean Kasinoan, "erabilera ezberdinak frogatzeko". Urtarrilaren 17tik 20ra izango da lehen jarduera sorta.

"Kultura arratsaldeak Kasinoan" dinamika aurkeztu dute, azpiegituraren aukerak esperimentatzeko
Kasinoa bizirik egoteko helburuarekin, ekintzak antolatuko dituzte hilabetero. / Aiaraldea | Ikusi handiago | Argazki originala

"Kasinoaren erabilera ezberdinak frogatzeko" zenbait ekimen antolatu ditu KULTURKONek (Laudioko Kultura Kongresua) urtarrilerako. "Kultura arratsaldeak kasinoan" deitu diote zikloari, eta urtarrilaren 17tik 20ra izango da. Emaitzen ostean, hausnarketarako tartea hartuko dute, "akatsak hobetzeko aukerak aztertzeko".

Egitasmoa herriko kultura bultzatzeko sortu zen: "Helmuga lortzeko, urrats batzuk ematea ezinbestekoa dugu". Horietako bat da erabilera anitzeko azpiegitura txukun eta hornitua atontzea. "Horretarako esperimentazioa eta entseguak dira aukera onena, bidea nola egin behar den zehazteko", azaldu dute.

Hilero, azkenaurreko asteburuan egingo dituzte kultura ekitaldi sortak, ostegunetik igandera. Bertako eta kanpoko gonbidatuek hartuko dtue parte, "eta espazioa hornitzeko hainbat saiakera egingo dira". Etorkizunean "iraunkorki mantentzeko hornikuntzak erostea" espero du plataformak, esperimentazioen emaitzak kontuan hartuta.


Urtarrileko egitaraua
Urtarrilean 4 ekintza egingo dituzte, estilo anitzetakoak. Itxarkundia taldeak, Laudioko Irakurketa Klubak eta ASASAM elkarteek hartuko dute parte, besteak beste. Zehazki, hau da prestatutako egitaraua:

  • Urtarrilaren 17an, 18:00etan, "Dantzagarriak" (Sant Rokezar nagusien taldearekin) pianoz lagunduta dantzaldia egongo da.
  • Urtarrilaren 18an, 19:00etan, "Neguko dantza plaza" (Itxarkundia Dantza taldearekin)
  • Urtarrilaren 19an, 18:00etan, "Kafe literarioa" irakurketa ezberdinekin (Laudioko irakurketa taldearen eta ASASAMen eskutik). Horrez gain, Laudioko dantza talde gazteen emanaldia egongo da, Akelarre eta The fife Queens taldeena.
  • Urtarrilaren 20an, 19:00etan, "Antzerki foruma", Cear Euskadiren eskutik.


Kultura Asanbladaren asmoa da "Kultura arratsaldeak Kasinoan" ekimenari jarraipena ematea, apirila edo maiatzera arte. Erantsi dutenez, Kasinoa bizirik egotea da hurrengo urteetako helburua".

Bestalde, Laudioko Kulturkonen lehenengo foro teknikoak egin dira, plataformak adierazi duenez. Horrez gain, Euskal Herriko zenbait esperientzia ezagutzeko txangoak egin dituzte: "Eraikin publikoen kudeaketa komunitarioaren inguruko jardunaldietara bidaia egin genuen, eta Kasinoaren akustikaren inguruko mahai teknikoa burutu genuen ere". Oiartzunen, Durangon eta Gasteizen egon dira, besteak beste.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa