Ibilgailu elektronikoen erabilerara saltoa ematear dago Laudioko Udala. Mota horretako bi furgoneta eskuratuko ditu tokiko erakundeak. Urtarrilaren amaierara arte dago eskaintzak aurkezteko epea.
Ondoren, hautatutako enpresak hiru hilabeteko epea izango du bi ibilgailuak entregatzeko, matrikulatuta eta serigrafiatuta. Horrez gain, 3 orduko formazio saioa eskaini beharko du enpresa horrek, hamar langileri furgonetak nola erabili irakasteko.
Hala jakinarazi du Amets Meatzak. Alkateordearen arabera, udalak 38 ibilgailu ditu gaur egun. “Horietako batzuk udaltzaingoarenak dira, baina gehienak obra eta zerbitzuetako langileek erabiltzen dituzte. Gehienak diesel motako motorra dute”. Gauzak hala, ibilgailu horiek elektrikoengatik “modu mailakatuan” ordezkatzea da udalaren asmoa.
63.994 euro baliatuko ditu tokiko erakundeak bi furgonetak erosteko. Bi dirulaguntza baliatuko ditu horretarako: Arabako Foru Aldundiaren 5.420 euroko bat eta Eusko Jaurlaritzaren 11.000 euroko beste bat. Gainontzeko 47.754 euroak udalak berak jarriko ditu.