Laudioko PSE-EEko bi kidek proposamena plazaratu dute gaur Kasinoaren erabileraren eztabaidan eragiteko. Loli Muriel zinegotziak eta Eduardo Diaz tokiko batzordeko kideak hiru ardatz izango dituen planteamendua azaldu dute. Gauzak horrela, hurrengo ildotan banatu dituzte euren ideiak Kasinoak erabilera anitzeko izaera izan dezan:
- Bilerak eta ekitaldiak antolatzeko gunea. Alde batetik, PSE-EErentzat, tokiko zein kanpoko enpresek aukera izan behar dute batzarrak, trebakuntza jardunaldiak, ikastaroak edota azokak antolatzeko. Horrez gain, kultura ekitaldiak, castingak eta abar gauzatzeko eremua izango litzateke. Azkenik, ezkontzak eta jaunartzeak ospatzeko lekua ere egongo litzateke. "Betiere catering zerbitzua baliatuta, bertan ez baitago sukalderik" nabarmendu dute sozialistek.
- Ikus-entzunezko sorgunea. Esparru horretan aritzen diren profesionalak, ekintzaileak eta zaleak batzeko topalekua ere izatea nahi dute.
- Pop Up: Turismoa erakartzeko informazio puntutzat jo dute espazioa, egun jakinetan ekintza turistikoak prestatzeko: dastatzeak eta txangoa... Herriko eta eskualdeko historiaren interpretazio zentroa ere garatuko litzateke bertan.
Eduardo Diazek aipatu du horiek direla sozialistei bururatu zaizkien ideiak, hainbat herritarren iritziak jasota. Hala ere, Loli Murielek zehaztu du ez dela proposamen itxia, eta ez dutela mozio bilakatuko Udal Osoko Bilkuran bozkatzeko.
Izan ere, Laudioko sozialisten asmoa da Kasinoaren erabilerari buruzko eztabaidan eragitea. "Hurrengo astean Kulturkonek prestatutako jarduerak hasiko dira, eta uste dugu une egokia dela gogoratzeko oraindik ez dugula ekarpenak egin, Kasinoaren funtzioak oraindik ez baitira zehaztu, eta bertan 2,7 milioi euroko inbertsioa egin du Arabako Foru Aldundiak".