Laudioko Udalak Adikzio planaren baitan egindako lanaren berri eman du. Isabel Boveda zinegotziaren hitzetan, 2017aren lehen hiruhilekoan kalean zentratu zuten osasun ohitura sanoak sustatzeko kanpaina. Oraingoan, baina, 12-21 urte arteko gazteen artera bideratu dituzte indarrak. Ortzadar enpresak gidatu ditu nerabe eta hezitzaileak pilatzen diren guneetako esku hartzeak. Guztira, 12.500€ erabili dira zeregin horretarako eta Eusko Jaurlaritzak gastuaren %30 hartu du bere gain.
"Espero baino gehiagora iritsi"
"Urtarriletik maiatzera eta urritik abendura egin ziren saioak, hezitzaile bat egon da txoko, eskola, garraio eta abarretan", zehaztu du Bovedak. Kolektibo sozial zein kulturalekin ere aritu dira elkarlanean. "1.740 pertsonekin egin dute lan", azpimarratu du. Hori dela eta, udal gobernu taldeak oso ondo baloratu du eginiko lana, "eurek espero zutena baino gehiagora iritsi dira". Aurrera begira, mota honetako egitasmoak lantzen jarraituko dute, prebentzio eta kontzientziazioa sustatzeko. "Jarraikortasuna izango du garrantzitsua delako".
Ondorioen berri ez dute eman, "kasuak diskrezioz eramaten direlako". Azaroko udalbatzan PSE-EEk egitasmoaren inguruan galdetu zuen, eta emaitzak pilatu eta batzordean aurkeztu ostean eman diete berri herritarrei.