Hitzaldia eskainiko dute Arrigorriagako Harrera Sareko kideek bihar -otsailak 2, larunbata- Laudioko Orbeko Etxea baserri okupatuan. Arrigorriagako Gaztetxean errefuxiatuei egin zaien harrera izango dute hizpide.
Urrian hasi ziren gaztetxean migratzaileei harrera egiteko lanean. Afrikatik bertaratutako 10 pertsona hasi ziren bertan bizitzen, hainbat boluntarioren laguntzarekin. Gazte Asanblada, Ongi Etorri Errefuxiatuak eta hainbat norbanako ari dira elkarlanean egitasmoa aurrera ateratzeko, Geuria hedabideak eginiko erreportaje honetan azaltzen denez.
Finantziazio bila
Orain, proiektua finantzatzeko kanpainari heldu diote Harrera Sareko kideek, hamar errefuxituek herrian ahal bezain duinen bizitzeko aukera izan dezaten. Kamisetak eta poltsak jarri dituzte salgai horretarako.
Egitasmorako dirua biltzea izango da, hain zuzen, hitzaldiaren ostean egongo diren kontzertuen helburua. Hainbat talde igoko dira Orbekoko oholtzara 21:00etatik aurrera: Berlingo Earth Crust Displacement eta Svart Up, Bartzelonako Avslag eta Ugaoko Erruki Jauna.