Aitor Aurrekoetxeak gose eta egarri greba abiatu zuen atzo Laudioko Udaletxearen sarreran salatzeko ez diotela baimenik eman taloak saltzeko San Blas azokan. Aldi berean, iragarri du protesta utziko duela bakarrik alkateak azalpenak ematen badizkio hedabideen aurrean.
Talogileak adierazi du Lehiaren Euskal Agintaritzak behartzen duela zozketa bidez erabakitzera espazio publikoaren banaketa, eskatzaile ororentzat lekurik ez badago. Mungiarrak dio aurretik epaiketa irabazi diola udalari antzeko kasu batean.
Udalak bat egiten du Kukutze San Blas elkartearen erabakiarekin
Laudioko alkateorde Jon Ander Altubek gaur goizean azaldu du tokiko erakundeak ez duela San Blas azoka antolatzen, baizik eta Kukutze San Blas elkarteak.
Berez, ordezkariak elkarteak egiten duen lana goraipatu du eta erabakia babestu du: "Kukutze San Blasek lan handia egiten du baserriaren oroimen historikoa berreskuratzeko eta eurek antolatzen dute azoka. Guk soilik ematen diogu baimena eremu publikoa erabiltzeko, eta berak kudeatzen du".
Epaiaren harira, Altubek nabarmendu du ez dagoela ados Lehiaren Euskal Agintaritzaren ikuspuntuarekin: "Auzoko jaietan edo Galiziar Etxeko jaietan edota Araba Euskarazen inork ez die esaten antolatzaileei zein txosna edo barraka jarri behar den. Hori antolatzaileek erabakitzen dute".
Azkenik, alkateordeak gehitu du udalak antolatzen dituen azoketan oinarriak zehazten dituela: "Dolumin Barikua udalak antolatzen du eta oinarrietan argitzen du zeintzuk diren baldintzak postua jartzeko, baina San Blas azokan laguntzailea da, besterik ez".
Bestalde, Kukutxe San Blas elkarteko kideek adierazi dute espazio publikoak mugak dituela eta ez dagoela lekurik ekoizle edo eskatzaile guztientzat eta, ondorioz, batzuk kanpoan geratu behar izan direla.