Defenestre fest jaialdiaren IX. edizioa egingo dute gaur Laudioko Orbeko Etxea baserri okupatuan. Amhra, Black Panda, Hairesis, Hell Division eta Los Conejos taldeek joko dute 19:30etik aurrera. Zita berezia izango da, egitasmo solidario batera bideratuko baitute biltzen duten dirua. “Basket beats borders” proiektua laguntzea izango da jaialdiaren xedea. Oihana Alberdi dago ekimen horretan buru-belarri “Aspalditik ezagutzen ditut jaialdia antolatzen duten pertsonak. Proposamena bidali nien eta berehala erantzun zidaten kontzertuetarako dirua proiektura bideratu nahi zutela”, azaldu du.
Errefuxiatuen egoera saskibaloiaren bidez eraldatzea da egitasmoaren xedea. “Errefuxiatuak toki batean ixten dituzte eta ez diete ateratzen uzten. Horrek asko mugatzen ditu hainbat gauza egiterako orduan. Argi mozketa etengabeak dituzte, ur edangarririk ez... ez dute espazio propiorik”. Gauzak hala, kirolak “espazio propio” horren eraikuntzan laguntzen duela uste du Alberdik. “Gazteei lagundu egiten die elkar erlazionatzen, bizitzarekiko irizpide kritikoak izaten, eguneroko osasuntsu eta positibo bat garatzen”.
Topaketa udan Euskal Herrian
“Inklusibitatea eta genero perspektiba” ere lantzen ditu proiektuak, Alberdiren esanetan, “eskaintza anitza izan dadin bai neska zein mutilentzat, euren adineko gazteak ere ezagutu dezaten”. Shatilako errefuxiatu esparruan sortutako nesken saskibaloi talde bat du ardatz egitasmoak. Topaketak antolatzen dituzte, saskibaloia praktikatu eta “bizitza esperientziak elkartrukatzeko”. Euskal Herrian egin nahi dute aurtengo topaketa, ekainaren 18tik uztailaren 10era. Baina ez dira horretara mugatuko. Shatilan bertan zentro bat ere sortzen ari dira. “Topagune bat izango da, kirolarekin erlazionatutako gauzak egiteko balioko duena”.