aiaraldea.eus

Aurten hasiko dira Ertzain-etxeko eta Suhiltzaile Parkeko obrak

Erabiltzailearen aurpegia Txabi Alvarado Bañares   Politika  Laudio

Hitzarmena egin dute Arabako Foru Aldundiak eta Eusko Jaurlaritzako Segurtasun Sailak, obrak egin ahal izateko. 3,4 milioi euroko aurrekontua baliatuko dute lanetan.

Aurten hasiko dira Ertzain-etxeko eta Suhiltzaile Parkeko obrak
Ordezkari politiko ugari egon dira gaur eginiko prentsaurrekoan. / Aiaraldea.eus | Ikusi handiago | Argazki originala

Prentsaurrekoa eskaini dute gaur eguerdian Ramiro Gonzalez Ahaldun Nagusiak eta Estefana Beltran de Heredia Eusko Jaurlaritzako Segurtasun Sailaburuak Laudioko Suhiltzaileen parkean. Bertan eta alboan dagoen Ertzain etxean egingo diren obren berri eman dute bi ordezkari politikoek. Hitzarmena egin dute Arabako Foru Aldundiak eta Segurtasun Sailak lanak bideratu ahal izateko. Oinarrizko proiektua erredaktatu dute jada. Behin betiko proiektuaren egikaritzea esleitu behar dute orain, eta beste hainbat tramite ere burutu behar dituzte obrei ekin baino lehen. Izan ere,  Hiri Ordenamendurako Plan Orokorra moldatu behar izan dute lanak garatu ahal izateko. Aurreikusi dutenez, 3,4 milioi euro baliatuko dituzte obra egiteko.

2021. urterako amaituta
Gauzak hala, lanak urte amaieran hastea aurreikusi dute bi erakundeek. “15 hilabeteren buruan egongo lirateke eginak”, jakinarazi du Ramiro Gonzalezek. Modu horretan, berrikuntza  guztiak 2021. urterako bukatuko lirateke, dena ondo bidean.

Suhiltzaileen parkea izango da aldaketa handiena izango duen azpiegitura. Handitu egingo dute eraikina, alboan dagoen parkea txikituz. Kamioi eta ibilgailuentzako gunea berriztu nahi dute horrela. Sarbide berriak jarriko dituzte, eta helikopteroentzako gunea atonduko dute. Eraikin-bloke osoaren fatxada ere aldatuko dute. “Bi Enplegu Eskaintza Publiko aterako ditugu laster, barne-promoziokoa bata eta librea bestea”, gaineratu du Ahaldun Nagusiak.

Ertzain-etxean, aldiz, eraikinaren irisgarritasuna eta erosotasuna handitzera egongo dira bideratuta atonketak,  Beltran de Herediak argitu duenez. “Sarbidea berrituko dugu eta jasogailu bat jarriko dugu, irisgarritasuna bermatzeko”. Horrez gain, itxarongela moldatuko dute, “toki eroso eta hurbilagoa izan dadin”. Indarkeria matxistarekin erlazionatutako salaketak egiteko tokia ere berrituko dute. “Jasangarritasun energetikoa bermatzeko moldaketak ere egingo ditugu”. Funtsean, eskualdeko bizilagunei eskaintzen zaien zerbitzua hobetzea izango da lanen xedea, Segurtasun Sailburuaren hitzetan.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa