1984. urtean sortu zen aisialdi taldea Laudion eta hori ospatzeko elikadura eta ikuskizunetan oinarrituko du proiektua datozen hilabeteetan, Aiaraldea hedabideari azaldu diotenez: "Elikadura, jaten duguna garelako aukeratu dugu. Eta, ikuskizuna, ikusten duguna garelako".
"Ekoiztu, kuzinatu eta jan"
Boluntarioki kudeatzen dute elkartea Kirikiñokoek, baita ekintza andana ere. Gainera, oraintsu, 168 metro koadroko espazioa eskuratu dute: "taldearen baratza eraikitze lanean gabiltza astero hamaika boluntario".
Laudioko Ugarte auzoan egokitu dute eremua, eta eskualdeko haur eta gazteekin bertara irteerak egitea dute xede, "astean behin edo birritan". Ekoizteaz gain, kuzinatu ere egingo dute: "Ortutik pasa ostean sukaldatzea dagokigu, eta horretarako hilero antolatuko ditugu sukaldea hizpide izango duten jardunaldiak".
Hala, umeek hainbat errezeta prestatuko dituzte, ondoren jateko. "Goizetik bazkalostera arte luzatuko dira sukaldaritza tailerrak", erantsi du Ander Fernandez Moltaban kideak.
"Ikusten duguna garelako"
Ikuskizunena izango da bigarren ildoa. Hiru alor bereizi dituzte eskaintzaren barruan: paradisu zinema, antzerkigintza eta irratigintza. "Paradisu zinema, hilabeteroko maiztasunarekin, igandeetan gauzatuko da. Ildo honen zati hau Laudioko kultura etxeko areto batean egingo da. Parte-hartzaileek proiekzioa bukatutakoan, postontzi baten bitartez, hurrengo filma zein izango den aukeratzeko aukera izango dute", aurreratu dute.
Itzal antzerkigintza, ipuin kontaketak eta bestelako ikuskizunak uztartuko dituzte antzerkigintzaren adarrean. Bestalde, Uhinak irratiarekin elkarlanean "umorea eta musika" nahastuko dituen irratsaioa ekoitziko dute.
Kirikiñoko bazkideek ekintzetan deskontuak izango dituzte, eta izena emateko lehentasuna. "Horrez gain, urtero opari bat jasoko dute, eta bazkideei bideratutako ekintza bereziak eta zozketak ere egingo ditugu".
Bazkide egiteko izenemateakirikino@gmail.com helbide elektronikora bidali behar da mezua, edota Laudioko Kultura Etxean galdetu. Urteko kuota 10 eurokoa izango da. Zalantza edo argipenak jasotzeko ondorengo telefonoa jarri dute eskura: 688 726 665.