Laudioarra zara jaiotzez, baina urteak daramatzazu Australian bizitzen. Zer dela eta?
56 urte daramatzat Australian. Laudiotik atera nintzen bizitza berri bat hasteko helburuarekin, nire etorkizuna apurtu zuena ahazteko asmoarekin. Ilusioz betetako bizitza hasi nuen Laudion, baina oso azkar zapuztu zen. Horregatik erabaki nuen joatea.
Bizitza gehiena eman duzu Australian, beraz. Oso ezberdina da bertako bizitza hemengoarekin alderatuta?
Bizitza-maila bisitatu ditudan Europa edo Hego Amerikako beste herrialde batzuetakoa baino hobeagoa da. Gustatuko litzaidake herrialdeari buruzko informazio gehiago ematea, baina ez ditut datu estatistikoak asko kontrolatzen. Hala ere, herrialdearen egoera hobezina da gaur egun, segurtasun nazional zein pertsonalaren aldetik, batez ere.
Australiako Eskupilota Federazioaren sortzaileetako bat zara.
Bai. Beti izan dut gustuko eskupilota, baina ikasle garaian soilik praktikatu dut. Euskal Herrira egin nuen bisitetako batean elkarrizketa bat izan nuen Jose Mari Gorostiagarekin. Euskal Pilota Federazioko kidea zen bera garai hartan. Kirola probatzea erabaki nuen orduan.
Orduan sortu zenuten Australiako federazioa?
Bai. Federazioko presidentea eta presidenteordea ezagutzeko aukera ere izan nuen (Carlos Lasa eta Kepa Aroitajauregi, hurrenez hurren).
Eurak izan ziren konbentzitu nindutenak. Australiara itzultzean talde bat osatu nuen egitasmoa aurkezteko. Modu horretan sortu zen Euskal Pilotaren Australiako Federazioa. Aho batez erabaki zuten ni presidente izatea.
Euskal Herriko federazioarekin bilera izan nuen, eta Euskal Pilotaren Munduko Kontseilua sortzea erabaki genuen. Aurrera atera zen egitasmoa eta gaur egun funtzionatzen jarraitzen du. Gure federazioa kontseilu horren kide fundatzailea da.
Zein da eskupilotaren egoera Australian?
Eskupilota nahiko geldi dagoela esan daiteke. Herrialde honetan oso zaila da kirol hau aurrera ateratzea, azpiegitura falta dugu. Hori da arazo handiena. Ezin dezakegu jende gaztea trebatu frontoirik ez badugu, frontoi batean ikusten duzulako benetan nolakoa den eskupilota.
Baina badituzue hainbat talde, ez?
Nik asko borrokatu dut hori egia bihurtu dadin. Neska talde bat izan dugu federazioan hainbat herrialdetan lehiatu dena: Argentinan, Estatu Batuetan, Venezuelan eta Txilen, besteak beste. Azken norgehiagoka Euskal Herrian egin genuen, Bilboko Miribilla frontoiaren inaugurazioan.