Vidrala B.C. izan zen saskibaloiaren esparruan aitzindaria Laudion. Gerora Llodio B.C. kluba izan zen, baina hasieran beira ekoizten duen enpresaren egitasmoaren ondorioz sortu zen. Garaiko zuzendariak Pedro Ormazabali eskatu zion proiektua gauzatzeko, eta hala egin zuen lantegiko beharginak, kirol horren zale amorratua baitzen.
Horren berri eta geroko 16 urteen gaineko informazioa emateko, Ormazabalek berak liburua idatzi du eta gaur aurkeztu dute Vidrala taldeko bulegoetan. Izan ere, enpresak finantzatu du argitarapena eta 500 ale kaleratu dituzte.
Testuak 159 irudi ditu eta 1970. eta 1986. urteen artean bizitakoa jaso du. Guztira, 400 jokalari baino gehiago izan zituen klubak eta emakumezko taldeak ere osatu zituzten. "Garai horretan ez zegoen kirolik neskentzat, eta guk uste genuen saskibaloia praktikatzeko aukera izan behar zutela" adierazi du Pedro Ormazabalek.
Horrez gain, jarduera oso arrakastatsuak antolatu zituzten. Adibidez, 24 eta 36 orduko txapelketak antolatzen zituzten Laudioko plazan.
Aurkezpen publikoa
Idazleak jakinarazi du apirilaren hasieran aurkezpen publikoa egingo dutela Laudioalde Lanbide Heziketako Ikastetxean. Ormazabalen asmoa da ahalik eta jende gehien batzea liburua banatzeko, doakoa baita.
Ekitaldi horretara proiektuarekin lotura izan zuten lagunak ekarri nahi ditu idazleak. Besteak beste, Josean Kerejeta Baskoniako presidentea gonbidatu du. Kerejeta jokalari profesionala ere izan zen eta Laudion egiten ziren udako partidatan lehiatu zen.
Esan bezala, Vidralak hartu du bere gain liburuaren maketazioa eta argitarapena. Aitor Peña marketing arduradunak azaldu du interesa izan zutela hasieratik eta Carlos Delclaux presidenteak berak eskutitza idatzi du libururako.
Pedro Ormazabal oso pozik agertu da elkarlanarakin: "Bi hilabetetan egin dugu dena, azkarra eta erraza izan da, nik uste baino askoz gehiago".