aiaraldea.eus

Senatuan “Araba eta Euskadiren interesak” defendatzeko prest azaldu da Almudena Otaola

Erabiltzailearen aurpegia Txabi Alvarado Bañares   Politika  Laudio
Senatuan “Araba eta Euskadiren interesak” defendatzeko prest azaldu da Almudena Otaola

Ekitaldia egin du gaur arratsaldean EAJk Laudioko Aldai plazan. Almudena Otaola okondoarrak hartu du hitza bertan, bera baita senaturako hautagaia.

Politikari jeltzaleak nabarmendu du Madrilen “Euskadi eta Arabako interesak” defendatuko dituela soilik. Otaolaren ustez, “oso garrantzitsua” da EAJk senatuan indarra izatea, bertan dauden beste politikari batzuek berehala ahazten dutelako “nor diren eta nondik datozen”.

Mikel Legardak hitz egin du gero. Espainiako Kongresurako hautagaiak nabarmendu du Euskadiko “bizitza, lurraldea, konektibitatea zein eskubide historikoak” defendatzera joango dela Madrilera. “Ez gara bertan geratzeko joango, itzultzeko baizik”.

Andoni Ortuzarren hitzartzea
Andoni Ortuzar izan da mikrofono aurrean jartzen azkena. Datozen hauteskundeen garrantzia nabarmendu du Euskadi Buru Batzarreko presidenteak, “aukera handiak” daudelako EAJ “erabakigarria” izan dadin. “Ez da erraza izango, eskumako zein ezkerreko 'kaudillismoarekin' topo egingo dugulako”, adierazi du politikariak, baina erronka bat duela gaineratu du: “Maroto eta Oyarzabal etxera bidaltzea”.

Aiaraldearen egoeraren inguruan ere mintzatu da. “Euskal agendaren hiru adibide topatu daitezke eskualde honetan: Industria, ibaien saneamendua eta Aretako trenbideko lurpeko igarobidea”.

Azken egitasmo horren garrantzia nabarmendu du Ortuzarrek, Laudioko Udal Gobernuaren jarrera kritikatzearekin batera. “Orain obra amaitua dagoela argazkia egitera joan dira EH Bilduko kideak, eurek ez dutenean ezer egin eta Espainiako aurrekontuetan egitasmoaren aurka bozkatu zutenean”. Gauzak hala, Laudiok beste alkate bat behar duela argudiatu du Buru Batzarreko buruak, “enpresak entzun eta lagunduko dituen alkate bat”.

Ikusi argazki guztiak handiago

Senatuan “Araba eta Euskadiren interesak” defendatzeko prest azaldu da Almudena Otaola - 15

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa