Apirilaren 13an irabazi zuen Iraide Izagak Marocco Trail lasterketa Ait Ben Haodoun. Aiaraldea hedabidearinadoerazi dionez, Marokon dago oporretan laudioarra eta aurreko egunean ikusi zuen kartela. Hala erabaki zuen izena ematea; eta partaidetza arrakastatsua izan zuen, emakumeen kategorian garaipena lortu baitzuen.
10 kilometroko ibilbidea bete zuen Izagak 51 minututan: "Esperientzia oso polita eta desberdina Izan da. Lurraldea oso bestelakoa da, basamortua. Harriak, hondarra eta erreka txiki batzuk zeharkatu genituen eta sekulakoa beroa egin zigun, 30 gradutik gora".
Guztira, 300 parte-hartzailek eman zuten izena. Batzuk umeak ziren, baina bazegoen ere puntako kirolariren bat ere, “gizonezkoetan artean Rachid Ramzik (olinpiar jokoetan 800 eta 1500metroetako txapeldunak) ere parte hartu zuen", argitu du Izagak.
Irabazi izanagatik ez ezik, Iraide Izaga oso pozik dagoela adierazi du bertako giroa dela medio: "Berez 09:00etan hasi behar zen, baina 11:00ak aldera arte atzeratu zen... hemen esaten duten bezala "insha'Allah" (jainkoak nahi badu). Jendeak erlojua ez zuen begiratzen Euskal Herrian bezala. Beroketa gutxi egiten dute, beste filosofia batekin hartzen dute, askoz lagunkoiagoa eta herrikoiagoa da dena. Edozein oinetakoekin egiten dute korrika, ahal duten moduan, baina gu baino askoz azkarragoak dira, hala ere”.