San Joan Astobitzako festen egitaraua zabaldu dute dagoeneko. Txosnagunean erasorik ez dela onartuko adierazi dute: "Gogoraraztea tristea bada ere, San Joan jaietan ez dugu inolako eraso matxista, sexista ez eta homofoborik onartuko. Gozatzera bazatoz, ordu txikitan soka tira egitera gera zaitezke, bestela, gera zaitez etxean lasai".
Egitarauari dagokionez, larunbat iluntzean hasiko dira jaiak, auzoko krossarekin 20:00etan. 22:00etan, berriz, kontzertuak egongo dira Astarte, Brigade Loco eta Akerbeltz taldeen eskutik.
Igandea, egun nagusi
Igandean izango da udako solstizioa, eta egun hori indartu nahi izan du Jai Batzordeak. Hala, 12:00etan ziza dastaketa egingo dute, Laudioko mikologia elkartearekin elkarlanean. Eguerdian meza eta Andere abesbatzaren kantaldia egongo dira, eta segidan Itxarkundia dantza taldearen erakustaldia. Zelaian, berriz, artzain txakurren txapelketa antolatu dute.
Arratsaldean pilatu dituzte haurren ekintzak, buruhandiak eta jolasak kasu. Ohi bezala, zanpantzarrak igoko dira herrigunetik auzora iluntzean, 22:00etan suaren bueltan udari ongietorria emateko. Basajaun erromeriarekin girotuko dute urteko gaurik laburrena.
Ekainaren 30ean, aldiz, kofradeen bazkaria eta meza izango dira eguerdiko ekintzak, trikitilari eta panderojoleek lagunduta.