aiaraldea.eus

“Aurten harrobia asko hazi da eta emaitza ikusgarriak izan ditugu”

Erabiltzailearen aurpegia Txabi Alvarado Bañares   Kirola  Laudio

Laudioko Atletismo Klubeko presidentea da ALBERTO TALLEDO PINEDO (Laudio, 1971) . Igandean egingo den Josito Memorialaren V. edizioari buruz mintzatu da.

“Aurten harrobia asko hazi da eta emaitza ikusgarriak izan ditugu”
Laudioko Atletismo Klubeko presidentea da Alberto Talledo Pinedo. / Aiaraldea.eus | Ikusi handiago | Argazki originala

Igandean izango da Josito Memoriala. Zer berrikuntza izango ditu aurtengo edizioak?

Gu beti saiatu gara proba kirolari herrikoira bideratzen, bera delako probak merezi dituena. Aurreko edizioetan apur bat erdipurdi geratu zitzaizkigun zenbait adin-tarte. Ume ugarik parte hartzen zuten, baina 14-18 urte bitartekoek ez zuten nola parte hartu. Horregatik, aurten 16 urtera arte zabaldu dugu hasierako lasterketetan parte hartzeko aukera. 16-18 urte bitartekoek, aldiz, 10 kilometroko lasterketan parte hartu ahalko dute, gurasoen baimenarekin betiere. Adin tarte horretako pertsonak gai dira lasterketa nagusia egiteko, horretarako prestatuak badaude. Hori da berrikuntza nagusia.

Elikadurari lotutako hitzaldia eskaini zenuten lasterketaren aurkezpenean. Zer dela eta?

Zerbait ezberdina egin nahi genuen, bestela aurkezpenak bost minutu iraungo zuelako. Nutrizioaren gaia jorratzea erabaki genuen, kirolean zein bizitzan oso garrantzitsua delako.


“16-18 urte bitarteko gazteek parte hartzeko aukera izango dute aurtengo Josito Memorialean”



Dozenaka lagun bertaratu ziren aurkezpen horretara. Kluba osasuntsu dagoela dirudi.

Bai, oso giro ona dago. Bakoitzak bere zeregina du. Jende ugari kanpoan geratu zen, erabilera anitzeko aretoa txiki geratu zelako.

Harrobi indartsua izango duzue, beraz.

Bai. Aurten harrobia asko hazi da eta emaitza ikusgarriak izan ditugu. Bi urte daramagu zuzendaritza berriarekin. Federatuak eta eskola mailakoak banatzea erabaki dugu.

Edu Frutosek lan handia egiten du federatuekin eta emaitzak agerikoak dira. Eskola mailakoak eta federatuak batuta, 100 kide inguru egongo dira klubean.

Josito Memoriala izango da ikasturteko azken proba. Zein helburu dituzue datorren urteari begira?

Eskola mailan hilabete honetan amaituko dira jarduerak eta federatuetan, aldiz, uztailean. Urritik aurrera hasiko da kros denboraldia.

Baditugu erronka ugari. Korrikalariak apur bat hobeto trebatu nahi ditugu, bakoitzak bere diziplinan sakontzeko. Garaiak aldatzen dira, duela 30 urteko entrenamenduek eta gaur egungoek ez dute zerikusirik.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa