Ohi bezala, ekaineko azken larunbatean ospatuko dituzte Laudion Sanpedropeko jaiak. Egitarau oparoa antolatu dute Jaiak koordinakundeko aurtengo ediziorako, arratsalde eta gaueko eskaintza ere atondu baitute.
Sukalki lehiaketarekin emango diote hasiera egunari goizeko bederatzietan, Aldai plazan. Lehen postuan geratzen diren parte hartzaileek saskia eta txapela jasoko dituzte sari moduan, bigarren postua erdiesten dutenek saskia eta zapia eta hirugarrenek, aldiz, urdaiazpiko hanka.
Ordubeteko tartea baliatuko dute epaileek sukalki onenak zeintzuk diren ebazteko. Bertsolariak egongo dira bien bitartean, plazan dagoen giroaren inguruak inprobisatzen. Bazkaria egingo dute gero, sukalkia oinarrizko plater moduan baliatuta.
Kontzertuak Alberto Aceron
Arratsaldean, aldiz, bingoa eta Beti Jai elektrotxaranga egongo dira. Olinpiadak egingo dituzte gero, arratsaldeko zortzietan Batzalarrin kalean. “Iaz egin genituen lehenbiziko aldiz, eta arrakasta handia izan zuten”, azaldu dute Jaiak Koordinakundeko kideek.
Iluntzean, aldiz, Alberto Acero plazara mugituko da jaia, erromeriak joko baitu bertan.
Sanpedropekoak amaituta, abuztuko Sanrokeei begira geratuko dira Jaiak Koordinakundeko kideak. Hainbat ekimen dituzte koadrilek esku artean abuztuko jaietarako. “Aurten ez dugu jolasgune erraldoia antolatuko. Saskibaloiarekin lotutako ekimen bat egingo dugu horren ordez, Baldarrak koadrilaren eskutik”, aurreratu dute.
Koadrila berria
Pozik daude Jaiak Koordinakundeko kideak, koadrila bat batu delako antolakundera. Azkenak du izena eta hogei urte inguruko gazteez osatua dago. “Ekimenak antolatzeko gogoak dituzte gainera”. Belaunaldi aldaketa, beraz, apurka apurka bermatzen ari dela dirudi.
EGITARAU OSOA
9:00 // Sukalki txapelketa
11:00- 13:00 // Umeentzako tailerrak
13:30-14:30 // Bertso saioa (Epaimahaiak sukalkiak dastatzen dituen bitartean)
14:30 // Bazkaria
16:00 // Bingoa
18:00-20:00 // Elektrotxaranga
20:00 // Olinpiadak eta ogitarteko jana, Batzalarrin kalean
23:00 // Erromeria