Duela hiru urte antolatu zuten Aretako Trail Lasterketaren lehen edizioa, eta jaietan bere toki propioa aurkitu du dagoeneko.
Elkartasuna jorratuko dute aurtengo edizioan. Kirol probaren antolatzaileek akordioa sinatu dute Bihotzez elkartearekin. Gauzak hala, lasterketan parte hartzeko ordaindu beharreko 10 euroetatik 2 euro bideratuko dira kardiopatiak dituzten haurren familien talde horretara.
Larunbat arratsaldean egingo da lasterketa. Parte hartzaileek 13 kilometroko bidea osatu beharko dute. Izen ematea irekita dago jadanik Sportmaniacs.com webgunean.
"Herritik eta herriarentzat"
Antolatzaileek nabarmendu dutenez, “herritik eta herriarentzat” antolatuta kirol proba da Aretakoa. “Gure helburua ez da puntako norgehiagoka bat antolatzea".
Parte hartzaile kopuruari dagokionez, markak hautsi nahi dituzte antolatzaileek. “Iaz 135 korrikalari bertaratu ziren eta aurten 200ra iristea espero dugu, hori baita jarri dugun muga”.
Emakumeen parte hartzea sustatzea da buruan duten beste erronketako bat, iaz zortzi baino ez baitziren egon.