Oinatz Manterola lehenengo aldiz lehiatu zen maratoian ekainaren 16an Tolosaldeko 3 Tontorrak lasterketan. 43 kilometroko eta 2.800 metroko desnibela izan zuen aurretik, baina emaitza oso positiboa eskuratu zuen. Izan ere, 2. sailkatu zen bere kategorian, hau da, Sub23 promesetan.
Laudioarrak azaldu du goizeko lehen ordutik gogor jotzen zuela eguzkiak, eta ondo elikatzea eta hidratatzea ezinbestekoa izan zela. "Ibilbideak baino, beroak izutu ninduen", argitu du Manterolak.
Gazteak adierazi du lehen 21 kilometroak dibertigarriak izan zirela, baina 30. kilometroan sufritzen hasi zen. 37. kilometrora arte une gogorrak izan zituen eta azken tontorra zapaltzeko 3-4 kilometro egin zituen aldapan gora.
Horren ostean jaitsierari ekin zion, Federico Tejedor lasterkariarekin egin zuen giro onean.
Helmuga gurutzatu zuenean jakinarazi zioten Manterolari 2. postua eskuratu zuela Sub23 promesa kategorian. Hori dela medio, oso pozik dagoela aitortu du. Bere hurrengo erronka Peregainako igoera izango da, uztailaren 6an Artziniegan.