Non jaio zinen?
Berez, Londresen jaio nintzen. 10 urte nituenean etorri nintzen Euskal Herrira familiarekin, 1989an. Geroztik bizitza osoa eman dut hemen, Irlandako Errepublikan bizi izan nintzen 3 urteak kenduta. Sukarrietan, Muruetan -Gernika-, Gasteizen eta, azkenik, Laudion bizi izan naiz azken 8 urteak.
Nire ama Bilbokoa zen eta aita irlandarra. Londresen bizi ziren eta nik uste dut nazkatu egin zirela. Bizitza lasaiagoa nahi zuten eta etorri ginen garaian izan zen Margaret Thatcherren Poll Tax afera, hau da, jende orori zerga kopuru bera ordaintzeko ahalegina egin zuenean, bakoitzaren diru sarrerak aintzat hartu gabe.
Zer gogoratzen duzu zure Londres eta Irlandako garaiei buruz?
Txikia nintzenez gehien oroitzen dudana eskola da. Londresi dagokionez, gogoratzen dut oso leku lasaia zela. Egia da hiriburu oso handia eta jendetsua dela, baina nire kalean ez zegoen trafikorik, han amaitzen zelako errepidea, eta handik ibiltzeko aukera genuen, herri batean bezala.
Aldaketa handia izan zen zuretzat Euskal Herrira etortzea?
Bai. Hizkuntzaren kontua, adibidez, oso gogorra izan zen. Abuztuan heldu ginen eta Gernikan hasi nintzen ikasten irailean. Erdaraz moldatzen nintzenez apur bat, erabaki nuen erdaraz ikastea. Esan zidaten agian errepikatzeko beharra izango nuela hizkuntzagatik, baina buru-belarri jarri nintzen eta, ez nuen ikasturtea berriro egin behar izan.
Hala ere, denborarekin uste dut akatsa izan zela. Nire arrebak euskaraz ikasi zuen eta orain primeran mintzatzen da bizkaieraz. Nik, ostera, ulertu bakarrik egiten dut.
Horrez gain, klima aldaketa nabaritu nuen. Hemen euri gutxiago daukagu eta egunak luzeagoak dira. Han neguan 16:00etan gaua heltzen da.
Eskolan nabaritu nuen harremana irakasleekin askoz informalagoa zela. Hemen izena erabilita hitz egiten nuen irakaslearekin eta han ez zen horrela.
Hasieran lagunak faltan botatzen nituen, baina gero lagun berriak egin nituen. Hala ere, zaila izan zen.
Ez duzu sentimendu abertzale berezirik?
Bai, egia esanda, ingelesa naiz pasaportea dudalako, baina hortik harago ez naiz ingeles sentitzen. Adibidez, Brexitaren ondorioz, pasaporte irlandarra eskuratuko dut agian (Berdin dit, paper bat da). Erresuma Batuak eta Estatu Espainiarrak lortzen duten akordioaren arabera izango da.
Ingelesa zure ama hizkuntza izan ez ezik, zure lan tresna ere bada.
Bai, hasieran elektronika ikasten hasi nintzen, baina utzi nuen; eta konturatu nintzen itzulpengintzan ondo moldatzen naizela.
Zure alaba laudioarra da, nola moldatzen zarete hizkuntzen esparruan?
Nik beti hitz egiten diot ingelesez, baina ez dut lortu berak hizkuntza horretan erantzutea. Gazteleraz egiten dit, ziurrenik etxean bikoteak eta biok horrela egiten dugulako. Gutxienez, dena ulertzen du eta hori irabazten du.