Uxoa futbol areto taldeak modu bikainean amaitu du denboraldia. Liga irabazi ez ezik, Euskal Ligara ere igo da. Albiste horrek, edonola ere, ardura berriak eman dizkio klubari. "Kategoria hori altua da eta fitxak, epaiak eta isunak askoz garestiagoak dira", azaldu du Jon Ander Llano Abasolo jokalariak.
Gauzak horrela, bere aurrekontua bikoiztu beharko du taldeak. "Autogestioaren bitartez lan egiten dugu. Ez dugu inolako diru-laguntza publikorik jasotzen eta babesleen eta zozketen bidez lortzen ditugu bitarte ekonomikoak" adierazi du kirolariak.
Hurrengo denboraldirako udalarekin harremanetan jarriko badira ere, larunbatean bazkaria egingo dute bi helbururekin: "20. urteurrena eta liga irabazi dugula ospatzea, eta dirua eskuratzea hurrengo denboraldiko gastuei aurre egiteko”.
Hitzordua larunbatean izango da Aldai plazan 15:00etan eta menua paellak, oilaskoak, hostopilak eta kafeak osatuko dute. Gaur bertan La Caixa bankuko ES62 2100 6548 0501 0017 9724 kontu korrontean egin behar da diru sarrera; eta izen eta abizenak zehaztu ez ezik, zenbat lagunentzako tiketak nahi diren zehaztu behar da.
