Arabako Foru Aldundiak obrak abiatuko ditu udazkenean Laudioko Kultura Etxean. Asmoa da urtebetean amaitzea, hau da, 2020an. Guztira 2,6 milioi euroko inbertsioa izango da.
Lehenik eta behin, eraikineko kanpoko hormak zaharberrituko dituzte, irudia hobetzeko. Apaingarriei bereziki erreparatuko diete, eta kalteak dituzten elementuak jatorrizko material eta geometria berdinekin berreraikiko dira.
Halaber, kanpoko arotzeria berritu edo haren ordez beste bat jarriko dute, kontserbazio egoeraren arabera. Proiektuan jasotakoaren arabera, zurezko leihoak zaharberrituko dituzte mantentzea posible denean, betiere ganbera isolagarridun beira bikoitz berriak ipinita eta osorik mantenduta balkoietako ateak, eskulekuak eta heldulekuak, burdinazko barruko ateak...
Teilak ere aldatuko dira beroa ez dezan galdu eraikinak. Horretarako, gainera, biomasa baliatuko duen berogailu sistema jarriko dute, egungoak gasoila erabiltzen baitu. Galdara gela berria eta biltegiratze siloa Kultura Etxetik urrun dagoen esparru bakartu batean jarriko dira.