Koagulazio sistema jarri nahi dute Laudioko hiltegian odol isurketak ekiditeko

Aspaldiko odol isurketa Nerbioi ibaian.

Ander Añibarro alkateak iragarri du gaur 140.000 euroko kreditu espediente aldaketa proposatuko dutela hurrengo udalbatzan horretarako.

Behin baino gehiagotan odol isurketak gertatu dira Laudioko hiltegian eta hori ekiditeko koagulazio sistema instalatu nahi du udal gobernu taldeak.

Ander Añibarro alkateak azaldu du azpiegitura berriak odola koagulatu eta hondakina bilakatuko duela, animalien gainerako soberakinekin birziklatzeko.

Nahiz eta sistema ezberdinak aztertzen ari diren, EAJk eta PSE-EEk uztailaren 29ko udalbatzan proposatuko dute 140.000 euroko kreditu espediente aldaketa.

Berez, isunik ez badu jaso ere, URA agentziak zenbait eskutitz bidali dio Laudioko Udalari jakinarazteko isurketa mota horiek konpondu behar dituela.

Hobekuntzak eta segurtasuna hiltegian
Asteartean behi batek ihes egin eta lagun bat zauritu ostean, hiltegiko egoera hobeto aztertuko du udalak. Gaur gobernu taldeko bi kidek jo dute hara.

Alde batetik, alkateak adierazi du astearteko ezbeharra norbaiten "arduragabekeriaren ondorioa izan zela" eta bideo grabaketak aztertzen ari direla gehitu du.

Bestalde, hiltegiaren egoera orokorra analizatzen ari dira, hobetu behar diren esparruak zehazteko.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide