Munduko Txapelketan lehiatzen aritu da Aaron Garmendia Sanchez laudioarra, Imanol Garai Izabalekin bikotea osatuta. La Molina, Katalunian, jokatu zen Munduko Rogaine Txapelketa uztailaren 27tik 28ra bitartean. Kirol modalitate horretan orientazioa da gakoa eta 24 ordutan ahalik eta baliza gehien eskuratu beharra dago.
Orkatila hala moduz zuela bertaratu zen norgehiagokara: "Duela astebete orkatila bihurritu eta munduko txapelketa kolokan jarri zen. Irteera orduan dudak nituen, baina ezin zaio hain erraz munduko txapelketari uko egin". Imanol Garaik bendatu zion orkatila, "eta bikain joan zen".
24 orduko proba izanik, hiru ordu eman zituzten mapa irakurri eta ibilbidea zehazten: "Zelako mapa! Ia metro bateko luzera zuen". Hamabietan atera ziren, ekaitz eta hotz artean, "lehen hamabi orduetan akatsik gabe eta azkar joan ginen". 10 onenen artean zeuden Koparen lehen txanpan. "Gaua heltzean ezin ginen mapan zentratu hotzagatik, eta lehen akatsak heldu ziren. Ezin genuen minutu bat ere ez gelditu, blai eginda geunden eta".
Kirolari laudioarrak sare sozialetan zabaldu du bere balorazioa: "24 orduko lehen lasterketa zen, eta badira gauza asko hobetzeko, hotza kudeatzeko estrategia... Baina egindakoari ezin zaio meriturik kendu: munduko 12. sailkatua Euskal Raid izatea ez da gauza makala. Talde honek badu xarma bat ezin dena azaldu: lehiakorrak gara denak baina familia bat, erokeriak egiteko elkartu garen taldea. Harro!".