Eskaileren gunean sarbidea errazteko igogailua jarri edo ez baloratuko du Udalak. Ander Añibarro alkateak adierazi duenez, 236.595€ suposatuko dute lanek: “Aurreko agintalditik dator egitasmoa. Benetan beharrezkoa den aztertu beharko dugu orain, gastu handia baita. Lege-agintaldi honetan sarbidea errazten ahaleginduko gara, baina kiroldegiak arazo gehiago ditu: aparkaleku eskasia, azpiegitura zaharkitua… Kontu asko konpondu behar dira, eta baliabide ekonomiko gutxi ditugu, nahiz eta udalaren egoera ona izan zentzu horretan”.
“Exekutatzeko prest dago egitasmoa, egokia den unean garatzeko”, erantsi du. Horrez gain, diru-laguntzak aztertuko dituzte, Eusko Jaurlaritzak obraren %50 har baitezake bere gain. “Edozelan ere, kiroldegiko sarbide eta irisgarritasunari buelta eman beharko diogu”, azpimarratu du.
Añibarrok azaldu duenez, lau milioi euro jasotzeke ditu instituzioak, baina beste erronka batzuk ere dituzte eskuartean: Zubiko Etxearen konponketa eta Antzokia eraikitzea kasu. “Irailetik aurrera emango dugu gaur egun erredaktatzen gabiltzan Gobernu Planaren berri, talde politikoei aurkeztu ostean”. Hala, 2020ko aurrekontuak udazkenean eztabaidatzeko asmoa agertu dute jeltzaleek.