170 urte inguru dauka ohiturak, eskualdean ardoa inportatzeko arauak aldatu zirenean, hain zuzen. Aurretik ardo bakarra saltzen zen urte osoan eta hori kontsumitzera behartuta zegoen jende oro. Ardo hori zein izango zen kalitatea irizpide batzuen arabera erabakitzen zen. Horrez gain, ardogileak 4 zezen ere ekarri behar zituen jaietan korridetarako.
Ordea, erregulazioa aldatu zenean, kofradiak berak ekin zion bazkariko ardoa hautatzeari, Jose Luis Navarrok azaldu bezala. Nafarroa, Errioxa eta Arabar Errioxako ekoizleei eskatzen zizkien kofradiak laginak, kalitate proba egiteko eta bermatzeko ardoa ona zela.
Urteko ardoa da beti bazkarian zerbitzatzen dena. Lehen Odoloste Egunean dastatzen zuten ardoa eta 24 orduko tartearekin garraiatu behar zuten Laudiora. Duela zenbait urte kofradiak erabaki zuen aurreratzea hautaketa.
Aurten kofradiako 13 kidek parte hartu dute "Fora" deituriko prozesuan eta iaz 15 izan ziren. Emakume batek parte behar zuen atzo, baina oporretatik itzultzean garraioarekin arazoa izan zuenez, ez zen heldu. Erakundearen batzar orokorrak izendatzen ditu urtero dastatzaileak boluntarioen artean.
"Iaz 6 edo 7 ardogileren produktuak jaso genituen, baina uzta oso txarra izan zen. Aurten, ordea, emaitzak hobeak izan dira eta ekoizleek bidali dituzte 10 botilak" azaldu du Jose Luis Navarro kofradiako maiordomoak.
Bazkariaren egunean bertan 400 litro ardo kontsumitzen dira, baina kofradiak 600 edo 700 erosten ditu urte osoan edateko. "Uzta oso ona bada, noizbait 1.400 litro hartu ditugu, jendeak eskatzen baitu" argitu du Navarrok.