aiaraldea.eus

KOP, Kaleko Urdangak eta Skabidean & The Black Birds taldeak ekarriko ditu, besteak beste, Laudioko Txosna Batzordeak

Erabiltzailearen aurpegia Izar Mendiguren Cosgaya   Kultura  Laudio

Laudioko Txosna Batzordeak haur, gazte eta helduentzat prestatu du egitaraua. Abuztuaren 13an agerraldia egingo dute plazan, "oztopo guztien gainetik, jai herrikoiak aurrera!" lemapean.

KOP, Kaleko Urdangak eta Skabidean & The Black Birds taldeak ekarriko ditu, besteak beste, Laudioko Txosna Batzordeak
Egitarau oparoa prestatu du aurten ere Laudioko Txosna batzordeak. / Aiaraldea | Ikusi handiago | Argazki originala

Urrezko Katxia Orbeko Etxeari emango dio aurten Txosna Batzordeak, hainbat urtetan eginiko lana eskertzeko. Abuztuaren 15ean, 13:00etan zabalduko dute Laudioko txosnagunea, "Urrezko katxiaren banaketarekin". Tximeleta eta Akerbeltz musika taldeek emango diete hasiera ikuskizun sortari. 

Azken urteetan bezala goizero familiagunea jarriko dute puzgarri eta jolasekin, eta 21:00etan "iluntze musikatuak" egongo dira. Kontzertuei dagokienean, Kop, The Potes, Mc Onak eta Skabidean& The Black Birds izango dira kartel buruak.

Alabaina, bestelako bakarlarik eta artistek ere hartuko dute oholtza; Izaskun del Cerrok, Xabi Basterrak, Perdido entre ilusiones kantautoreak, Kaleko Urdangak, Tinkok, Urrats erromeriak eta Susterbacks taldeak kasu. 

Edozelan ere, ez da gastronomia, bazkari eta dantzarako aukerarik faltako. Izan ere, abuztuaren 17an herri bazkaria eta bingoa egongo da, eta koadrillen bazkaria ere txosnagunean egingo dute.

Gainera, Odoloste egunean -abuztuak 24,- castellersak eta bertsolariak elkartuko dituzte, herri bazkarian indarrak hartu eta "Erdizka lauetan" ikuskizunarekin dantza-plazan aritzeko gero.

Laudioko Txosna Batzordeak sare sozialetan zabaldu duenez, abuztuaren 13an agerraldia egingo dute herriko plazan jasandako oztopoak salatzeko. 

 Laudioko Txosnak erabiltzailearen argazkia.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa