"Kolektorera eta ibaira ezin da odolik iritsi". Hori da Ander Añibarro alkatearen esanetan, itxieraren arrazoi nagusia.
"Horretarako aukera bakarra animaliarik bertan ez hiltzea da", erantsi du. Gobernu Batzordean politikoki landu dute gaia, eta alderdi guztiak daude arazoa konpondu beharrarekin ados. "URAren eskakizuna ez betetzeak arau hauste administratiboa ekarriko luke, eta horrek zigor espedientea irekitzea eragingo luke", aurreratu du.
Ertzaintzaren ikerketa
Fiskalaren aginduz, ikerketa egiten ari da Ertzaintza. Hala ere, "udal hiltegiaren itxiera behin-behinekoa da", argitu du gobernu buruak.
Egoera bideratzeko udaleko arloak lanean dabiltzala azpimarratu du: "URArekin bilera teknikoak egin ditugu, besteak beste. Obraren bidez URAren eskaerari erantzungo genioke, baina udal hiltegia aztertu ahala, azpiegituran erantzun beharreko arazo gehiago topatu ditugu".
Udalak kreditua moldatu zuen egitasmoari heldu ahal izateko, "141.000€ zeuden aurreikusita, eta lehen fase hau garatu ahal izateko 180.000€ behar dira".
Hori dela eta, tarteko bide bat arakatzen dabiltza, "ahalik eta azkarren udal hiltegia irekitzeko". Aurrerago emango dituzte zehaztasunak, "abuztua, oporrak medio, enpresekin kudeatzeko hilabete zaila baita".
Hiltegi zerbitzua eskaintzen duen enpresari indemnizazioa eska dakioke instituzioak, alkateak baieztatu duenez. "URAren baldintzak ez betetzeak ondorio batzuk ditu. Kalkuluak ateratzen ari gara arlo ezberdinetan, kontziente baikara zigortu beharko ditugula. Azpiegituraren arazoa konpondu liteke, baina odol isurketarena zailagoa da".
Abeltzainei dagokienean, eurekin harremanetan jarri direla erantzun du alkateak: "Egoera azaldu zaie, eta konplikatua izanik, ulertu egin dute. Udal hiltegiaren itxiera ez da erabaki politikoa izan, neurri mingarria izan da guretzat ere".
Oraingoz, beraz, ezingo dute hiltegia funtzionamenduan izan, "irekiera data ezin dugu uneotan aurreikusi".