“Auzo zinegotziak” egongo dira hemendik aurrera Laudion. Hala azaldu du Ander Añibarro Maestre alkateak: “Gobernu taldeko zinegotziak auzo ezberdinetan banatu ditugu, gune horien arduradunak izateko eta bertako bizilagunak zinegotziekin zuzenean harremanetan jartzeko”.
Auzo batzarrak mantenduko dituzte, dena den. Egitura horri jarraiki, zortzi gunetan bereizi dituzte: erdigunea Eva Martinezen esku geratuko da, Latiorrokoek Maite Cortazar izango dute buru, Gardeakoek Andoni Rodrigez, Ugartekoek Ana Diez, Larrazabal eta Landaluzekoek Juanje Merchan, Arrañokoek Loli Muriel eta landa gunekoek Joseba Amondo.
“Hilabete honen amaierarako espero dugu ezartzea funtzionamendua”, aipatu du alkateak. Auzo batzarrak, aldiz, urte amaierarako aurreikusi dituzte: “Auzo asanbladak zuzenean herritarren proposamen eta eskaerei irtenbidea emateko erabili nahi ditugu, efizienteagoak izateko bueltak ematen gabiltza, oraindik proiektua idazteke dago gogoeta fasean gaudelako”.
Auzo zinegotzien helburuez galdetuta, harremanak sendotzea dela xedea azpimarratu du Añibarro Maestrek: “Herritarrek zuzenean norengana jo jakitea, kexak edo ekarpenak webguneaz gain zuzenean zinegotziei helarazteko balioko du, zinegotziekin zuzenean hitz egiteko aukera izango dutelako”.
Hala, ordezkari horiek izango dira herritarren ekarpenei bide emango dietenak, “baita zer egin den eta zer ez azalduko dutenak ere”.