Belaunaldi aldaketa eta motibazioa izango dira Latiorroko aurtengo jaien motorra. Hala aipatu du Aitor Mate Jai Batzordeko kideak: “Iaz bost edo sei gazte indartsu sartu ziren, ideia freskoekin eta oso motibatuta. Aurten freskotasun hori nabaritu da gauzak antolatzean”. Ostiraletik igandera, orotariko ekintzak prestatu dituzte.
Aurreko urteetako filosofia berari eutsi diote programazioa prestatzean: “auzoko eragileen parte hartzea bilatzea”. Horren adierazle da zentro erregionalen inplikazioa, esaterako: “Lehen aldiz eskaini digute euren aldetik jardueraren bat antolatzea. Beti egon gara euren atzetik, baina orain arte ez dugu lortu”.
Musika eta umeen gunea jarriko dute, besteak beste. Halaber, Latiorro Eskolako Guraso Elkartearen danborrada egongo da ostiralean. Nobedade gisa, Herriaren pilota elkartearen partidak daude, “horrela auzoko azpiegiturak ezagutaraziko ditugu, frontoia urrun egonagatik laudiarrentzat ezezaguna baita”.
Euskal Herriko marmitako txapelketa antolatu zuten duela 2 urte. “Handi geratu zitzaigun, eta Batzordeko kide batzuk erre egin ziren. Iaz kolokan egon ziren jaiak, baina azken unean lau edo bost gazte azaldu ziren eta aurten asko nabaritu da euren freskotasuna. Belaunaldi aldaketa ematea zen helburua eta lortu egin dugu”, erantsi du.
Kontzertuetan talde ospetsuak ekartzeko saiakera egin dute: “Latiorroko jai egitarauaren alderik erakargarriena beti izan da musika. Hilzorian eta desagertzear egotetik freskotasuna eta motibazioa izatea lortu dugu, gazte berriei esker”. Aurten Kaotiko eta Enkore taldeak igoko dira oholtzara, besteak beste.
Egitarauari dagokionez, umeak izango dira protagonista ostiral eta larunbatean. Barikuan danborrada eta dantza zein antzerkia izango dituzte, eta zapatuan tailerrak edota puzgarriak. Horrez gain, mendi ibilaldia eta gastronomia txapelketa egongo dira, “azken ekimen horren 30. edizioa izango da aurtengoa”.
EGITARAUA
Irailak 13, ostirala
18:00 // Danborrada: Ibilbidea Txosnagunean hasi eta amaituko da. Latiorro HLHI eta “Jesuri” Guraso Elkartearen laguntzaz
19:00 // Txupinazoa: Lehenengo suziriarekin batera buruhandiak egongo dira Galtzagorri kultur elkartearen eta Sorginlarren Mitologia taldearen leskutik
19:00 // Kalejira Lankaietako lagunekin
20:00 // Pintxo poteoa
20:00 // Umeentzako ikuskizuna: “DJ KAKTUS: EUSKARAZ DANTZATU NAHI DUGU”
21:00 // Kontzertuak: PLACTON, KAOTIKO, DISKODANTZA
Irailak 14, larunbata
8:00 // XI. Mendi martxa: Izen ematea txosnagunean. Ohiko ibilbidea egingo da: Elorritxugane-Jesuri (Santa Marinan hornidura)
11:00 // Puzgarriak, umeentzako tailerrak eta jolasak
11:30 // Pilota erakustaldia
Latiorro eskolako frontoian
12:00 // Igel txapelketa Arantzar plazan
12:00 // Laudioko Musika Bandaren kalejira
14:30 // Herri bazkaria Pagolar kalean. Txartelak salgai auzoko tabernetan. Bazkalostean (16:30etik aurrera) Herri Bingoa eta Olinpiadak egongo dira
16:30 // Mus txapelketa
21:00 // Akelarre dantza taldearen erakustaldia
22:30 // Kontzertuak: “JATORRIZ” ERROMERIA, ENKORE eta DISKODANTZA
Irailak 15, igandea
8:00 // Latiorroko XXX. Marmitako txapelketa
13:00 // Kazolen aurkezpena
13:00 // Euskal Dantzen erakustaldia Itxarkundia dantza taldearekin
14:00 // Zozketa eta sari banaketa
15:00 // Marmitako bazkaria
19:00 // Txokolate jana
20:00 // Jai amaiera