400 neska futbolari batuko ditu Altzarratek irailaren 21eko torneoan

Izar Mendiguren Cosgaya 2019ko irailaren 11

Ellakuriko eta San Martineko azpiegiturak baliatuko dituzte torneoa jokatzeko.

Irailaren 21ean izango da torneoa, haur eta kimuen kategorietan nesken futbolari ikusgarritasuna emateko. 23 taldek hartuko dute parte.

Irailaren 21ean nesken kirola sustatzeko txapelketa antolatu du Altzarrate Kirol Elkarteak. 9:00etan hasiko da norgehiagoka herriko futbol zelaietan. Izan ere, Ellakuriko eta San Martineko azpiegiturak baliatuko dituzte.

Orotara, 11 elkarte edo klub bertaratuko dira: Athletic Kluba, Altzarrate, Lakua, Gorbeialdia, Mercedarias, Basauri, Aurrera Vitoria, Ipar Arriaga, Hauskaitz, Etorkizun eta Marianistas. Hala, bi multzotan antolatu dute ligaxka, Iñigo Egigurenen esanetan. "Haurren mailan 12 talde egongo dira, eta kimuetan 11", zehaztu du. Gainera, epaile ofizialak izango dituzte.

Ordutegiei dagokienez, 9:00etan hasiko dira, eta 14:30ean aurreikusi dituzte finalak. "Talde guztiek jasoko dute trofeoa, eta jokalari zein atezainek ere bai". Horrez gain, "jokalari kirolarienentzat" ere aparteko oroigarria prestatu dute. "Irailaren 21ean Laudioko futbol zelaiak beteko dituzte emakumeen siluetek, 400 neskatila ariko baitira aukeratu duten kirolarekin ondo pasatzen".

Kirola Laudio

LAGUN AGURGARRIA:

Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.

Izan bazkide