Gaur jakinarazi du Laudioko Txosna Batzordeak zein den aurtengo jaien inguruan egiten duen balorazioa. Lehenik eta behin, urte osoan lanean egon diren eragile eta norbanakoen ekarpena eskertu du eragileak.
Edonola ere, batzordeak balorazioaren zatirik handiena Laudioko Udalari bideratu dio, eta aldarria zabaldu du: "azken lau urtetan izandako kokalekura bueltatzea eskatzen dugu“.
Txosnetan aritzen diren taldeek uste dute ez dagoela inolako arrazoirik toki hori ez baliatzeko: "Aldai plaza bi goizez bakarrik erabili izan da (aurreko urteetan bertan egiten ziren ekintzak kontuan hartu gabe) eta gainera argi geratu da gure egitarauarekin guztiz bateragarriak zirela hauek. Are gehiago, esango genuke plaza hutsik egon dela momentu puntual batzuk salbu, lekuak eskaintzen dituen aukerak eta baldintzak aprobetxatu ez direlarik, ez txosna batzordeak, ez beste inork ere”.
Txosna batzordearen aburuz, "inposizioa" izan da leku aldaketa eta arazoak sortu dizkie: "besteak beste, erabakita genuen azpiegitura, baita egitarauaren zati batzuk moldatu beharra ekarri zuen. Eszenatokiaren altuerak, adibidez, bertan egindako ekintzen ikusgarritasunean eragin negatiboa izan du”.
Eragileak aldarrikatu du oztopo guztiak konpontzeko gaitasuna erakutsi dutela eta modu positiboan baloratu dute herritarren partaidetza jai guztietan zehar. Zentzu horretan, uste dute goizeko Familiaguneak erreferentzialtasuna irabazi duela, baita Odoloste Egunean egiten den bazkariak ere.
Aurrera begira
Gauzak horrela, Txosna Batzordeak iragarri du berehala hasiko dela lanean 2020ko jaiak prestatzeko: "irailetik aurrera jaiak antolatzen ditugun herritar eta eragile guztien aldetik lan egiteko modu parte hartzaileago eta integratzaileagoa behar dela uste dugu. Txosna batzordetik prestutasuna erakusten dugu hurrengo urtera begira beste kolektiboekin hitz egin eta elkarlanean aritzeko”.