Laudioko Udal Gobernu taldeak jakinarazi du "Agora" proiektua hautatu dutela Laudio Antzokia gauzatzeko. 6 lagunek osatu dute epaimahai teknikoa -4 arkitekto, udal aparejadorea eta soziokultura animatzailea- eta aho batez babestu dute Javier de las Heras Soléren lana. Orain tokiko erakundeak ekingo dio berarekin negoziatzeari, ideia egikaritzeko.
Arkitekto kataluniarraren egitasmoak 438 eserleku izango ditu, baina erdiguneko aulkiak kendu eta batu daitezkeenez, 700 plaza baino gehiago lor ditzake eraikinak.
Ander Añibarro alkateak goraipatu duenez, ezaugarri tekniko guztiak bete ez ezik, proiektuak konpondu du bertan egon zitekeen arazorik handiena: alboko etxebizitzekin batzea. Horrela, Antzokiaren estalkia plaza izango da inguruko biztanleentzat, hurbilen dauden etxebizitzen altuera berean egongo baita. Gainera, arrapala egongo da nahi duenak plaza hori erabili dezan. Soinua egokia izan dadin, Musikeneko emanaldi aretoa diseinatu duen Gasteizko enpresak parte hartu du proiektuan.
Nabarmendu dituzten beste alde batzuk dira Antzokiak ez duela puntu beltzik sortuko Latiorron, egurra eta kristala erabiliko direla, beirazko fatxada baliatu daitekeela proiekzioak egiteko eta kamerinoak, biltegia eta bulegoa izango dituela. Guztira, 3 solairutan banatutako 1.793 metro koadro erabilgarri sortuko ditu eraikinak, eta taberna izango du auzokideentzat.
5 milioi euro
Alkatearen hitzetan, Antzokia eraiki eta hornitzeko 5 milioi euro inguru beharko dira. 2020an proiektua erredaktatzeko asmoa dute, eta EAJ eta PSE-EEren nahia da 2021ean hastea obrak. Hala ere, Añibarrok azaldu du izapide oso luzeak egin beharko direla, prozesu garestia eta zaila baita. Horrez gain, Juanje Merchan sozialistak adierazi du hautaketa honekin zor historikoa konpondu nahi dutela laudioarrekin.