aiaraldea.eus

228.000 euro baliatuko ditu udalak Laudioko Industrialdean hainbat hobekuntza egiteko

Erabiltzailearen aurpegia Txabi Alvarado Bañares   Jendartea  Laudio

Spri taldeak (Taldea Eusko Jaurlaritzaren enpresa garapenerako agentziak) 96.000 euroko diru-laguntza emango dio tokiko erakundeari horretarako. Obrak urte amaierarako esleitzea aurreikusi dituzte.

228.000 euro baliatuko ditu udalak Laudioko Industrialdean hainbat hobekuntza egiteko
Laudioko Industrialdeko zenbait espaloi eta errepide hobetuko dituzte. / Aiaraldea.eus | Ikusi handiago | Argazki originala

Hainbat berrikuntza egingo ditu Laudioko Udalak herriko industrialdean. “Zonaldeko errepide eta espaloiak hobetzea izango da egitasmoaren xedea”, azaldu du Ander Larrinagak, “hainbat puntu identifikatu ditugu, irisgarritasuna falta zaielako edota hobekuntza zein garbiketa behar dutelako. Batxeak eta zuloak konponduko ditugu, gauza txikiak izango dira”.

Zinegotziak gogorarazi du iaz ere eskatu zela horrelako obrak egiteko diru laguntza. Aurten berriz aurkeztu da tokiko erakundea Industria Poligonoak Berritzeko Planera. Gauzak hala, 96.000 euro emango ditu Spri taldeak (Taldea Eusko Jaurlaritzaren enpresa garapenerako agentziak) lan horiek finantzatzeko. Egitasmoaren aurrekontua 228.000 eurokoa izango da guztira.

Obra urte amaieran esleitzea aurreikusi du udal gobernuak. “Behin lizitatuta, hautatutako enpresak 3-4 hilabete izango lituzke proiektua egiteko”, zehaztu du Larrinagak.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa