aiaraldea.eus

Gizonezko bat atxilotu zuen atzo Ertzaintzak, Vicalde enpresan lapurtzen zuen bitartean

Erabiltzailearen aurpegia Erredakzioa   Jendartea  Laudio

20:00ak aldera gertatu zen atxiloketa. Akusatua metalezko materiala lapurtzen saiatzen ari zen harrapatu zutenean, Ertzaintzak jakinarazi duenez.

Gizonezko bat atxilotu zuen atzo Ertzaintzak, Vicalde enpresan lapurtzen zuen bitartean
Gaur zenbait lan ari ziren egiten Vicalden. / Aiaraldea.eus | Ikusi handiago | Argazki originala

Lapurreta leporatuta pertsona bat atxilotu zuten atzo Vicalde enpresan. Lekukoek Aiaraldea hedabideari adierazi diotenez, herritar batek ikusi zuen gertaera, "norbait Vicalde enpresako pabiloi bateko atea irekitzen ari zen. Horretarako, furgoneta bat baliatu zuen atearen aurka". Horregatik, Udaltzaingoari jakinarazi zion, eta tokiko poliziak Ertzaintzari eman zion horren berri.

Handik gutxira, patruila batzuk bertaratu ziren Gardeako enpresara eta atea guztiz itxita ez zegoela sumatu zuten. Ondorioz, lantegira sartu ziren eta barruan topatu zuten furgoneta bat. "Ibilgailuaren atzeko partean 39 urteko gizonezko bat zegoen ezkutatuta, baita metalezko materiala eta kableak zituzten zenbait kutxa", aipatu diote Aiaraldea hedabideari.

Gizonak berak aitortu zuen lapurtzen ari zela, eta agenteek atxilotu egin zuten. Berez, indarra erabilita lapurtzea leporatu diote. Akusatuak aurrekariak ditu eta laster epaitegira jo beharko du.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa