12:00etatik 13:00etara egongo dira itxita Laudio, Amurrio, Ugao eta Bilboko saltokiak. Mobilizazioekin bat egiteko eskatu diete langileek herritarrei.
Berriak supermerkatuetako langileak borrokan daude berriz. Lanuzteak egingo dituzte bihar -larunbata- Laudio, Amurrio eta Bilboko saltokietan, 12:00etatik 13:00etara.
Beharginek salatu dute “izugarrizko lan karga” pairatzen ari direla eta zuzendaritzak langile bat kaleratu duela. “Horrez gain, behin behineko langileei ez diete kontratua berritzen”, gaineratu dute.
Honakoa ez da Berriak supermerkatuetako langileak mobilizatuko diren lehen aldia. Ekainean hainbat lanuzte egin zituzten saltoki kate horretako langileek, gauza hauek eskatzeko: urtero bost larunbat libre izatea, urtero zubi bat izatea gutxienez eta lan hitzarmenak jasotzen dituen lan orduak soilik egitea, eta ez gehiago.
Borroka horrek fruituak izan zituen, akordioa erdietsi baitzuten zuzendaritzarekin. Ondorengo onurak eskuratu zituzten horrela: urtero 5 larunbat libre izatea, baita zubi bat ere eta norberak hartzeko bi egun libre. Sartutako aparteko ordu guztiak aintzat hartzea ere lortu zuten beharginek.
Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.
Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.
Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.
Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.
Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.
