Azaroaren erdialdean ireki nahi du udalak hiltegia berriro

Joseba Amondo gaurko prentsaurrekoan. / Aiaraldea.eus

Joseba Amondo alkateordeak prentsari azaldu dio gaur goizean hainbat lan egin dutela eta, horri esker, azaroaren 2. edo 3. astean aurreikusi dutela hiltegia irekirik egotea.

Laudioko Udalak espero du azaroaren erdialdean irekitzea hiltegia behin betiko. Horretarako 140.000 euroko inbertsioa egin dute; teilatuko elementuak aldatu dituzte 22.000 euro gastatuta, 43.000 euroko inbertsioarekin sakrifikatutako animaliak garraiatzeko lerroak tratatu eta iturgintza lanak kontratatu dira, odola putzu bakarrean sartu eta kudeatzeko.

Horrez gain, udal langileek ur beltzak eta euri-urak banatzen dituen sistema konpondu dute eta hiltegia kudeatzen duen enpresak bere gain hartu du hainbat lan: zenbait areto hobetzea, esaterako.

Kudeaketa eredu berria
Joseba Amondo alkateordeak adierazi du hiltegiaren etorkizuneko kudeaketa eredua oraindik eztabaidatu behar dutela: "erabiltzaileekin eta beste erakunde batzuekin adostu beharra dago zein izango den. Laudioko hiltegia EAEko hainbat ekoizlek baliatzen dute, baita Aiaraldeko jende askok. Eztabaidatu beharra dago udal hiltegia izaten jarraituko duen edo eskualdekoa bilakatu behar den, adibidez".

Amondoren ustez, erakunde gehiagok egin behar dute ekarpen ekonomikoa: "Eusko Jaurlaritza ere, agian, batuko litzateke".

Momentuz, hiltegia kudeatzeko esleipena ez da berehala egingo. Alkateordeak azaldu du: "2020ko urtarrilean amaituko zaio kontratua egungo enpresari, baina luzatuko dugu hurrengo kontratazio baldintzak ondo zehaztu eta adosteko. Udan prestatzea da asmoa".

Bigarren fasea
Egindako obra guztiak lanen lehen fasea daude kokatuta. Horien bitartez hiltegia berriro funtzionamenduan jarriko da, araudia beteta.

Dena den, 2. faseari ekin behar diote oraindik; odola jaso, hondakin bihurtu eta garraiatzeko. Horretarako 370.000 euroko aurrekontua zuen udalak baina, egindako obren ostean, egokituko dute.

Ibilbide horretan guztian, udalak goraipatu du Eusko Jaurlaritzaren babesa ezinbestekoa izan dela.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide