aiaraldea.eus

Mendi ibilaldi solidarioa egingo du La Milagrosak igandean, lehenbiziko aldiz

Erabiltzailearen aurpegia Erredakzioa   Kirola  Laudio

Nomeolvides elkarteari emango diote ekimenaren bidez biltzen duten dirua.

Mendi ibilaldi solidarioa egingo du La Milagrosak igandean, lehenbiziko aldiz
Ermualderaino igoko dira parte hartzaileak. | Ikusi handiago | Argazki originala

Datorren igandean -urriak 27- egingo du La Milagrosa ikastetxeak mendi ibilaldi solidarioaren lehen edizioa. Nomeolvides elkartera bideratuko dute ekimenaren bitartez lortzen duten dirua.

Ikastetxeko jolastoki nagusitik abiatuko dira, 10:30ean. Ermualde izango dute helmuga. “Interesa duten pertsonek tiket solidarioa eskuratu ahal izango dute ikastetxeko idazkaritzan ekitaldiaren aurreko astean edo ibilaldiaren egunean bertan, 9:30etik 10:30era bitartean”, azaldu dute antolatzaileek, “tiket horiek bost euro balioko dute 18 urtetik gorakoentzat eta bi euro adin txikiko parte-hartzaileentzat”.

Nabarmendu dutenez, tiketarekin batera motxila bat jasoko dute parte hartzaileek, eta txokolatea zein txistorra jateko aukera izango dute amaieran.  Txokolatea jateko ontzi propioak eramatea eskatu dute ikastetxeko kideek, “plastikoaren erabilera txikiagotzeko”.

Ermualdera iritsita, herri kirolez eta musikaz gozatzeko aukera izango dute parte hartzaileek. Dirua biltzeaz gain, bigarren helburu bat ere izango du ibilaldiak: “egun osasuntsu batez gozatzeko aukera ematea, familia edo lagun giroan eta naturarekin kontaktuan”.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa