Euskadiko Lurraldeetako zurrumurru arrazistak salatzeko txokolate jana antolatuko dute azaroaren 17an Laudioko Herriko Plazan, 17:00etatik aurrera, CEAR-Euskadik (migratzaileen babesaren aldeko erakundea) eta Arabako Foru Aldundiak antolatuta.
Laudioko Udalak prentsa-oharrean azaldu du ekitaldia "Bizilagunak" kanpainan kokatzen dela, eta aurten laugarren urtea izango da horrelako “kultura arteko bizikidetzaren aldeko” ekitaldiak antolatzen direla.
Laudioko Gizarte Ongizate, Lankidetza, Osasun eta Berdintasun zinegotziak, Loli Murielek, bere partetik, herritarren partaidetzari men egin dio, txokolate janean ahalik eta kopuru handiena hurbildu dadin.
Iaz, esaterako, Araba osoan 44 nazionalitateko mila pertsona baino gehiagok hartu zuten parte; EAEn, berriz, 58 nazionalitateko 2.500 pertsona baino gehiago izan ziren partaide. Ekitaldian parte hartzeko beharrezkoa izango da izena ematea, eta inskribatzeko azken eguna azaroaren 7a izango da.
Bizilagunak Araba ekimenaren testuinguruan antolatutako kulturarteko txokolatada Laudioko zurrumurruen aurkako agenteek kudeatu eta dinamizatzen dute. “Ekintza hau herritarrok gure aktibismoak bultzaturik antolatu dugu. Migranteen eta errefuxiatuen giza eskubideen defentsan borondatez lan egiten dugun pertsonen taldea gara, udalerriko kultura-aniztasuna sustatuz”, zehaztu dute.
CEAR-Euskadiko kide bat, Virginia Cid, bestalde, kultura-aniztasuna bultzatzearen alde agertu da eta gaur egungo egoera soziopolitikoarekin kezka adierazi du: “Gezurrezko zurrumurru arrazistak, diskurtso politiko populistak eta xenofobiaz betetako iritzi publikoa ari gara bizitzen”.
Aurtengo edizioan arituko direnei eskerrak emateko topaketa ere antolatuko dute azaroaren 30ean, EHUko Letren Fakultatean, Gasteizen.