aiaraldea.eus

Udal liburutegi berria Lamuza Parkeko Musika Etxean jarri nahi dute

Erabiltzailearen aurpegia Aitor Aspuru Saez   Kultura  Laudio

Laudioko Udal Gobernu Taldeak aurreratu du Zubiko Etxean kokatu ordez, "ortuzainaren etxean" jarri nahi dutela.

Udal liburutegi berria Lamuza Parkeko Musika Etxean jarri nahi dute
Musika Etxea guztiz berritu dute barrutik, baina oraindik ez da guztiz erabiltzen. / Aiaraldea.eus | Ikusi handiago | Argazki originala

Prentsaurrekoa eskaini dute Laudioko EAJk eta PSE-EEk gobernuan igaro dituzten lehen 100 egunak baloratzeko. Aipatutako gaien artean, aurreratu dute urratsak ematen ari direla Udal Liburutegia Lamuza Parkeko Musika Etxe zaharrean -"ortuzainaren etxean", alegia- instalatzeko.

Aurreko legealdian adostu zuten EAJk eta EH Bilduk Zubiko Etxean kokatzea liburutegi berria, baina azterketa teknikoa burutu eta gero, konturatu dira horretarako obra handia eta garestia beharrezkoa dela. "Egitura indartu beharko genuke, pisu gehiegi hartuko baitu eta egurrezkoa da" adierazi du Ander Añibarro alkateak.

Ideia hori baztertu eta gero, helburua da liburutegi berria Musika Etxe zaharrean jartzea. Eraikin osoa hartuko luke egitasmo berriak eta liburuak maileguan hartzeko aukera eman ez ezik, umeentzako eta ikasteko guneak izango ditu.

"Lamuza Parkea berriro osatuko dugu, herriko kultura guztia bertan biltzeko eta egokitzat jo dugu aukera hau", argitu du alkateak.

Oraindik gainerako talde politikoekin eztabaidatu beharreko ekimena da, baina sozialistek eta jeltzaleek ziurtatu dute akordioa eta adostasuna lortzeko borondatea dutela.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa