Almudena Otaola senatariak -eta hautagaiak- hasi du ekitaldia, egoera politikoari keinu eginez: "Gertatu dena politikarien errua izan da, baina gu taldea -euskal selekzioa- gara eta irabazi behar dugu. Zuen indarra da behin eta berriz garaipena emango diguna". Senataria izanik, "hamarreko taldea" dutela azaleratu du: "Azaroaren 10ean boto guztiak mugitu behar ditugu Araba eta Euskadiren ordezkaritzarako. Boto eraginkor bakarra dago, EAJrena". Europa izango dutela ipar nabarmendu du, eta emakumeen borroka gogora ekarrita bukatu du hitzartzea. Izan ere, bihar beteko dira 86 urte emakumeek lehenbizikoz bozkatu zutenetik.
Mikel Legarda kongresuko ordezkariak Pedro Sanchezen inbestidura izan du hizpide, baita hartzen ari diren neurriak ere: "Kanpaina betean gaude. Jendeak uste du politika interesen sehaska dela, baina guretzat jendartearekiko eta gure lurraldearekiko konpromisoa da". Hauteskundeen garrantzia azpimarratu du: "Herritarrei bozkatzea eskatzen diegu, abstentziora jota berdin banatzen direlako eserlekuak. Gu gara diferentzia markatzen dugunak. Soluzioak proposatzera goaz, ez arazoak".
Aitor Estebanek, berriz, gainontzeko alderdien jarrera kritikatu du, PPrena nagusiki: "Ciudadanosekin elkarteko gai izan dira. Foralistak direla diote, baina ez horixe! Casadok argi esan du, murrizketak egin eta autogobernua kendu nahi dute". PSE-EEri dagokionean, Pedro Sanchezen federalismo eredua jarri du kolokan: "Euskadin eta Katalunian nazioen gaia blokeotik atera behar da. Bideak hiru ardatz ditu: naziotasuna aitortzea, aldebikotasuna eta epaile neutrala".
Iñigo Urkullu izan da parte hartzen azkena. Gehiengoa eskuratzea borondate kontua dela argudiatu du lehendakariak: "Azken urteetan gehiengo nahikoa izan da Madrilen, baina ez da borondaterik egon, Euskadin bai". Apirilaren 28tik Espainia 6 hilabete geldi eduki dutela kritikatu du, "hemen ez bezala". Adibide gisa aipatu ditu medikuntzako plazak, hezkuntzako programak, teknologia eta garapeneko proiektuak, enpresen sustapena edota Ertzaintzaren lan deialdia. "Euskadi martxan dago, politika positiboa eta eraginkorra da EAJrena". Alabaina, "inkisizio politikoaren hotsak" entzuten dira, Urkulluren aburuz: "Ez da VOX bakarrik, hau estatu kontua da. EAJ legez kanpo uzteko mehatxua larria da, eta gure erantzuna ere horrelakoa izan behar da. Datorrena datorrela, Euskadi defendatzen jarraituko dugu".