Laudioko Udalak teknologia berrien erabilera arduratsuari buruzko jardunaldiak antolatuko ditu datozen lau asteetan zehar. “Sareko indarkeriaren inguruan prebentzio tresnak lantzea” izango da helburua, eta “hezkuntza-eragileak, familiak eta herriko gazteak” izango dituzte hizpide.
Juan Jesus Merchan gazteria zinegotziaren arabera, “sare sozialetan zabaldutako informazioaren kontrola galtzen dela” jakinaraziko da jardunaldietan. Justizia soziala eraikitzeko, herritarren parte-hartzea eta oreka sustatzea ere bilatuko dute egitasmoaren bidez. Hala ere, sare sozialek gizartea hazteko “eszenatoki bikaina” ere eskaintzen dutela aitortu du Merchanek, eta arrisku handiena “haur eta nerabeekin” dagoela azpimarratu du.
Lau hitzaldiak doakoak izango dira. Azaroaren 12an, ziberfamiliak jorratuko dira; 19an, indarkeria eta ahalduntzea; 26an, teknologia berrien arrisku eta aurreikuspenak; eta abenduaren 3an, aldiz, kirolaren eta jarduera fisikoaren zerbitzurako sare sozialak. Hitzaldi guztiak Kultura Etxeko Arraño Aretoan izango dira, 18:00etatik 20:00etara.
Informazio eta komunikazio teknologien aldeko programa baten parte dira jarduerak. "Gizarte eskubideen aldeko hezkuntza lantzen duten hainbat programekin 10 urte daramatzate Laudioko ikastetxeetan lantzen. segurtasun positibotik eta analitikotik eraikitzeko ikuspegi metodologiko berri bat da".