Kontzertu bikoitza emango duzu Laudion, akustikoan bata eta taldearekin bestea. Zer desberdintasun dago bien artean?
Akustikoa jotzeko gitarrarekin bakarrik etorriko naiz; bandarekin pixka bat desberdina da. Noski, indartsuagoa ere bada.
Errepertorioa berdina da ala bi emanaldi desberdin direla esango zenuke?
Kanta batzuk berdinak izango dira, baina bakarka egitean beste modu batera egiten dut. Desberdinak izango dira bi emanaldiak.
Zure azken diskoa orain dela gutxi plazaratu duzu. Duela urtebete Amurrion beste disko bat aurkeztu zenuen.
Duela urte eta erdi bi disko aurkeztu genituen Amurrion. Araba aldean aurkeztuko dugun laugarren diskoa da honakoa, bai bakarka edo bai taldearekin.
Zer nabarmenduko zenuke disko honetatik?
Guztira zazpi taldekide izatera heldu gara, bost ere izan gara. Baina gero hirukote bezala egonkortu dugu taldea: bateria, baxua eta ni. Beraz, beste estilo batera eraman gaitu horrek, beste tonu eta doinu batzuetara. Banda bezala egin ditugu entseguak. Lehen, bakoitzak bere kabuz entseatzen zuen, diskoak zuzenean grabatzen genituen estudioan; bakoitzak ahal zuena egiten zuen. Honetan, hirurak batu gara hasieratik, grabaketa egin aurretik.
Disko kolektiboagoa da orduan.
Bai, hori da. Eta nabaritzen dela uste dut.
Lehen Tristan Mourguy eta Horeba zen taldearen izena.
Bai, kolektibo bat genuen, baina oso aldakorra. Batzuetan piano jolea zegoen, beste batzuetan tronpeta jolea... Orain, soinu moduan egonkortu eta izenaz aldatzea ere erabaki dugu.
Hemen inguruan ibili zarela aipatu duzu. Zu, berez, Iparraldeko musikaria izanda, zaila egiten da Hego Euskal Herrian jotzea?
Egia esan, toki guztietan begiratzen ditut jotzeko aukerak. Hego Euskal Herrian ditudan kontaktu guztiei idazten diet. Euskaraz dakien biztanleriaren %90 Hego Euskal Herrian dago. Iparralden, edo Lapurdin behintzat, euskal zale edo euskal musika zale gutxiago dago, eta nahiko zaila da aurrera egitea.
Nola definituko zenuke zure musika?
Edonon entzuteko moduko musika da. Non jotzen dugun ikusi eta, horren arabera, tonu lasaiagoa edo kañeroagoa ematen diogu. Tokiaren tamainaren arabera moldatzen dugu emanaldia, kontuan izanda jendea zutik ala eserita dagoen. Tokiaren arabera kantu ezberdinak jotzen ditugu.