Ludoteka zerbitzua ahalik eta lasterren irekitzeko eskatu dio Omniak udalari

Laudioko ludoteka ezin da erabili, obrak direla eta. / Aiaraldea.eus

Omniak ludoteka ahalik eta lasterren tokiz aldatzeko "borondatea" eskatu dio Udal Gobernuari. Alkateak, berriz, konponbideak bilatzen ari direla esan eta oposizioko alderdiaren "oportunismoa" kritikatu du.

Omnia alderdiak Laudioko ludotekaren aldi baterako itxiera eta behin-behineko beste kokaleku baten falta leporatu dio udal gobernuari, Kultur Etxeko obrek iraun bitartean. Oposizioko alderdiak EAJ kritikatu du ludotekak eskainitako zerbitzua alkatetzarentzat “lehentasuna ez delako”. Konponbide gisa, Frontoiko Etxea edo “Etxe nagusiko aretoren bat” erabiltzea proposatu du Omniak, ludotekaren behin-behineko kokaleku moduan. 

Talde politikoak azaldutakoaren arabera, “hasiera batean, ludoteka zegoen tokian mantentzeko asmoa zegoen, baina, arriskuak saihesteko, ixtea erabaki da”. Hala ere, azken asteetan, eguraldi txarraren ondorioz, esparru berri baten beharra nabarmendu du alderdiak: “Eguraldi txarra dela eta, ohiko erabiltzaileek haien seme-alabak ludotekara eramatean, zerbitzurik gabe topatu dute”.

EAJren jarrera politikoa kritikatu du Omniak beste behin ere: “Legealdii honetan, udala eta tokiko gaiak zeinen ondo kudeatzen ari denaren inguruan harropuzten den Gobernu Talde bat dugu; baina fatxada mediatikoa besterik ez da hori, akatsak eta efikazia falta ezkutatzen dituena”.

Udalaren erantzuna
Udal gobernutik, bestalde, ludoteka umeentzako esparrua izanik, beste edonon kokatzea “zaila” dela argitu dute: “Baldintza espezifiko batzuk eman beharko lirateke, eta momentuz ez daude”. Omniak proposatutako esparruak hasieratik errefusatu dituzte alkatetzatik, “ikastaro batzuk erraz aldatu ahal dira kokapenez; umeekin ezinezkoa da, haien segurtasunagatik”. Hala ere, arazoa konpontzeko “irtenbide egingarri bat” bilatzen ari direla jakinarazi dute udal gobernuko kideek.

Kontuan hartu beharra dago ludotekaren esparrua “urtebeterako” egongo dela itxita. Hala adierazi du Udaleko prentsa zerbitzuak. Etorkizunari begira, ludotekaren “tokian” eta “zerbitzuan” aldaketak egongo direla aurreikusi du gobernu taldeak. Amaitzeko, Omniaren jarrera “oportunista” kritikatu eta “arazoak ez dauden tokietan” bilatzeari uzteko eskatu dute.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide