Aretako Kultura Etxeko erabilera anitzeko gela irekiko da astero lau arratsaldez, auzoko umeentzako erabilgarri egon dadin.
Kudeatzaileetako batek, Txus Ladok, adierazi duenez, “familiek neguko hotzetik babesteko leku bat izatea” da helburu nagusia, tabernako partea pasa den otsailean itxi baitzen eta orduz geroztik ez da erabilgarri egon.
Hala ere, “behin behineko neurria” dela esan du Ladok, eta gehitu du ez dela araututako ekintza izango. Bere ustez, Aretan ez dago “egoteko espaziorik", parkea salbu. Gauzak hala, aurrerantzean Kultur Etxera hurbildu ahalko dira Aretan bizi diren umeak, hainbat motako jolasetan aritzera.
Kontuan hartu behar da, hala ere, ordu eta erdiz soilik egongo dela erabilgarri, 16:30etik 18:00ra, astelehen, astearte, ostegun eta ostiraletan.
Kultur Etxeko jaia
Horrez gain, ostiral honetan, abenduak 13, Aretako Kultura Etxeko jaia ospatuko da arratsaldetik gauera arte.
Ekintza nagusia Akerbeltzen kontzertua izango da, 22:00etatik aurrera. Ondoren, DJ´s Potiren musika emanaldia egongo da, gaueko ordu txikiak arte.
Jaia arratsaldeko bostetan hasiko da umeentzako tailerrekin eta zunba, pintxo-potea eta dantza plaza izango dira hurrengo ekintzak, kontzertuak baino lehen.